سهرۆكێ زانكۆیا دهۆك، د. داود سلێمان ئهتروشی، دیاركر كو وهزارهتا خاندنا بلند بۆردهكێ بلند یێ ههی بۆ دروست كرنا مهنههجهكی ئێکگرتی بۆ خاندنا بابهتێ جینۆسایدێ ل ههمی پشكێن زانستی ل زانكۆیێن كوردستانێ، گۆت ژی زانكۆیا دهۆك سهركێشیا ڤێ پرۆسێ دكهت، و پێشی ههمی زانكۆیێن کوردستانێیە د ڤی بواری دا.
ئهڤ داخۆیانیا سهرۆكێ زانكۆیا دهۆك، د. داود ئهتروشی، د كۆربهندهكێ زانستی دا هات كو پارێزگارێ دهۆكێ بەرێز، د. عهلی تهتهر، و سەرۆکێ جڤاتا پارێزگەها دهۆکێ بەرێز، فەهیم عەبدولا حەمۆ، بهرههڤ بوون، و ژلایێ سهنتهرێ ڤهكۆلینێن جینۆسایدێ زانكۆیا دهۆك و رێكخراوا نێڤدهولهتی یا كۆچبهریێ IOM و رێكخراوا یهزدا ب سپۆنسهریا ئاژانسا ئهمریكی یا گهشهپێدانا نێڤدهولهتی USAID ل رۆژا 16/9/2021 ل سهنتهرێ رهوشهنبیری و جڤاكی ل زانكۆیا دهۆك هاتیه ئهنجام دان.
ئهڤ كۆربهنده ل دۆر گرنگیا كارتێكرنێن كورتخایهن و درێژخایهنێن پرۆژێ Nobodys Listening Virtual Reality ل سهر پهیدابوونا هوشیاری و ههڤسۆزیێ یه بهرامبهر جڤاكێ ئێزدی و جینۆسایدێن دژی وان و ب دیتنا عیراقیایه بۆ جڤاكێ ئێزدی یه، ههروهكو رێڤهبهرێ سهنتهرێ ڤهكۆلینێن جینۆسایدێ ل زانكۆیا دهۆك، د. سالم جاسم، ئاشكرا كری.
د. داود ئهتروشی، ههروهسا گۆت "زانكۆیا دهۆك یا خهمخۆر بوویه دبابهتێ جینۆسایدێ دا، ههروهسا گرنگی پێ دایه و سهنتهرێ جینوسایدێ دامهزراندیه و چالاك كریه، كو ڤی سهنتهری رۆلهكێ گرنگ گێرایه د دكیومێنت كرنا وان كارهساتێن ب سهرێ مللهتێ مه هاتین و بتایبهتی ژی جینۆسایدا ڤێ دووماهیێ یا كوردێن ئێزدی، كو زانكۆیا دهۆك ب ئهركێ خۆ دزانیت بهلگهنامان كۆم كهت و چالاكیان ئهنجام بدهت و ناڤهندێن ناڤخۆیی و جیهانی پتر ل دۆر ڤان جینۆسایدان ئاشنا بكهت ب رهنگهكێ ئهكادیمی داكو ئهڤ جۆره جینۆسایده دووباره نهبنهڤه".
پارێزگارێ دهۆكێ، د. عهلی تهتهر، بهرههڤیا كارگێریا پارێزگههێ بۆ ههر بزاڤهكی بۆ كومكرنا بهلگهیان و دانهنیاسینا جینۆسایدێ دیاركر، ڤهكۆلهران ژی پهنهلهك پێشكێش كر و لایهنێن رێكخهرێن كۆربهندی دێ دهرئهنجامێن ڤهكۆلین و كارێ هاتیه كرن بۆ لایهنێن پهیوهندیدار كهنه راسپارد و هنێرن.