كۆلیژا ئەندازیاری رۆژا دیزاینا ئەندازیاری یا هەشتێ‌ ئەنجام دا

كۆلیژا ئەندازیاری ل زانكۆیا دهۆك چالاكیا رۆژا دیزاینا ئەندازیاری یا هەشتێ‌ ل رۆژا 30/5/2021 ل ئاڤاهیێن كۆلیژێ‌ ل كەمپێ‌ زانكۆیا دهۆك ب ئامادەبوونا هاریكارێن سەرۆكێ‌ زانكۆیێ‌ و ئەندامێن جڤاتا زانكۆیێ‌ و هژمارەكا مامۆستا و قوتابیێن كۆلیژا ئەندازیاری و بسپورێن ڤی بیاڤی ئەنجام دا.
راگرێ‌ كۆلیژا ئەندازیاری ل زانكۆیا دهۆك د. جیمس حسدو هیدو دیاركر كو رۆژا دیزاینا ئەندازیاری سالانە دهێتە ئەنجامدان و ئەڤ سالە یا هەشتێ‌ یە و پرۆژێن قوتابیان یێن هەر حەفت پشكێن كۆلیژا ئەندازیاری (شارستانی، ژێدەرێن ئاڤێ‌، تەلارسازی، كارەب و كۆمپیوتەر، میكانیك، بایۆمیدیكال، رۆپیڤان) هاتنە نیشادان، مەرەم ژێ‌ چێكرنا پەیوەندیایە دناڤبەرا زانكۆیێ‌ و كەرتێ‌ گشتی و تایبەت و هندەك ئەندازیار ژ رێڤەبەریان ل ڤێ‌ پێشانگەهێ‌ بەرهەڤ دبن و مفایی ژێ‌ دبینن.
بۆ شێوازێ‌ بجهئینانا پرۆژێن ڤێ‌ رۆژێ‌ دهێنە نیشادان د. جیمس گۆت ب رێكا كۆلیژا ئەندازیاری ل هەر پشكەكی لژنەك بۆ هەلسەنگاندن دیاركرنا پرۆژێن قوتابیان و دیاركرنا پرۆژە و دیزاینێن سەركەفتی هاتیە پێك ئینان و دوو ئەندامێن لژنێ‌ ژ دەرڤەنە ئێك ژ كۆمپانیێن كەرتێ‌ تایبەت و ئێك ژ كەرتێ‌ حكومی، هەروەسا بۆ دەلیڤێن كاری ژی دڤان جۆرە چالاكیان دا پتر دەلیڤە بۆ قوتابیان پەیدا دبن.
رۆژا دیزاینا ئەندازیاری چالاكیەكا سالانەیە و ل دووماهیا وەرزێ‌ خاندنێ‌ كۆلیژا ئەندازیاری ل زانكۆیا دهۆك بۆ قوتابیێن خۆ بەرهەڤ دكەت و تێدا پرۆژێن قوتابیان دهێنە نیشادان و هەلسەنگاندن.