ل رۆژا 28/11/2021 بەرپرسێ نڤیسینگەها كەنەدا ل هەرێما كوردستانێ بەرێز، ئیڤ دوڤال، دگەل دا شاندەكێ بالیوزخانا كەنەدا ل عەمانا پایتەختێ ئوردنێ سەرەدانا زانكۆیا دهۆك كر، و ژلایێ هاریكارێن سەرۆكێ زانكۆیێ ڤە پێشوازی لێ هاتە كرن، كو مەرەم ژ ڤێ سەرەدانێ ئەو بوو، داكو ژ نێزیك رەوشا زانكۆیێ ببینیت كا زانكۆ د چ ئاست دا پێدڤی ب هاریكاریا وانن و دێ شێن چ بۆ زانكۆیێ كەن، و د كیژ بیاڤی دا دەستپێشخەریێ بكەن و پەیوەندیان دگەل زانكۆیا دهۆك چێكەن.
د روینشتنەكی دا هاریكارێ سەرۆكێ زانكۆیا دهۆك بۆ كاروبارێن كارگێری و دارایی، د. ئەحمەد محەمەد سالح، رەوشا زانكۆیێ بۆ دیاركر هەر ژ دەسپێكێ و هەتا نوكە كا زانكۆ گەهشتیە چ ئاست، هەروەسا هاریكارێ سەرۆكێ زانكۆیا دهۆك بۆ كاروبارێن زانستی و خاندنا بلند، د. لقمان هادی حەسەن، بەحسێ باوەرنامێن هەڤپشك كر یێن زانكۆیا دهۆك دگەل زانكۆیێن دیتر، ب تایبەت یێن ئەلمانی و هەبوونا ڤی جۆرێ خاندنێ ل زانكۆیا دهۆك ب گرنگ هژمارت، ل دویف دا رێڤەبەرا ئوفیسا پەیوەندیان ل زانكۆیا دهۆك د. رەند حەمودی بەحسێ پەیوەندیێن زانكۆیا دهۆك كر دگەل زانكۆ و ناڤەندێن ئەكادیمی یێن جیهانی.
د. ئەحمەد محەمەد سالح دیاركر كو بەرپرسێ نڤیسینگەها كەنەدا ل هەرێما كوردستانێ ، یێ پێخۆشحال بوو ب ڤێ سەرەدانێ و سوز ژی دا دبیاڤێن ئەكادیمی دا پەیوەندیان دگەل زانكۆیا دهۆك گرێدەن و دەرگەهەكێ پەیوەندیان دگەل زانكۆیێن كەنەدی بۆ زانكۆیا دهۆك چێكەن، هیڤیی ژی خاست پێداویستیێن خۆ دگەل زانكۆیێن كەنەدی بكەنە پرۆپۆزەل و بدەنە قونسلخانێ، گۆت ژی ئەڤە دەرگەهەكێ باشە بۆ زانكۆیا دهۆك پەیوەندیان دەستپێبكەت دگەل زانكۆیێن كەنەدی و پەیوەندی پتر دگەل بهێنە گرێدان چونكو هەتا نوكە چ پەیوەندیێن بهێز دگەل زانكۆیێن كەنەدی نەبوون.