جڤاتا زانكۆیا دهۆك بریار دایە لژنەك ژ چەند ئەندامێن جڤاتێ، ب سەرۆكاتیا د. احمد محمد صالح، هاریكارێ سەرۆكێ زانكۆیێ بۆ كاروبارێن كارگێری و دارایی هاتیە پێكئینان بۆ رێكخستنا هاتنوچوونێ ل ناڤا كەمپێ زانكۆیێ.
د. دلشاد عبدالجبار حلیم، ئەندامێ لژنێ، دیاركر كو لسەر راسپاردا جڤاتا زانكۆیێ بریار هاتیەدان هندەك پاس بێ بەرامبەر بهێنە دابینكرن كو قوتابیان ل ناڤا كەمپێ زانكۆیێ ڤەگوهێزن، داكو بارگرانی نەكەڤیتە سەر قوتابیان، ب تایبەت قوتابیێن پشكێن ناڤخۆیی یێن كچان.
گۆت ژی، زانكۆیێ چەند وێستگەهێن راوەستانێ دیاركرینە، و ئەڤ وێستگەهە هاتینە بۆیاغكرن و جهێن وان هاتینە دەستنیشانكرن، و كۆمپانیا كورەك تیلیكوم دێ كابینێن وێستگەهان ب شێوەكێ مۆدێرن دروستكەت داكو باران و هەتاڤ كارتێكرنێ لێ نەكەت، و ژ دەمژمێر هەشتی سپێدێ و هەتا سێیێ پشتی نیڤرۆ، هەر 10 خولەكا پاسەك دێ هێتە وێستگەهێ و دێ هەمی كەمپێ زانكۆیێ بخۆڤەگریت.
د. دلشاد عبدالجبار ئەوژی دیاركر كو پلانەك هاتیەدانان داكو وەكو پێنگاڤا ئێكێ، ترۆمبێلێن تەكسی نەهێنە دناڤ كەمپێ زانكۆیێ دا، لدویڤ دا ل ئایندەی هەكە ئەڤ پلانە سەرگرت، و ئەڤ وێستگەهە كەڤتنە كاری، دێ هێلا زانكۆ ژی كەڤیتە كاری و ترۆمبێلێن قوتابیان ژی ناهێنە دناڤا زانكۆیێ دا و بتنێ دێ یێن مامۆستا و فەرمانبەران هێن، داكو بارگرانیا هاتنوچوونێ ل ناڤ كەمپێ زانكۆیێ پەیدانەبیت.