ئیتالیا دێ‌ كاری بۆ پێشڤەبرنا فێركرنا پەرستاری و چارەسەریا سروشتی ل دهۆكێ‌ كەت
July 5, 2021, 10:08 a.m.

ل رۆژا 1/7/2021 كۆمبوونەك هاتە ئەنجامدان بۆ بجهئینانا پرۆژەیەكێ هەڤپشك دناڤبەرا رێڤەبەریا گشتی یا ساخلەمیا پارێزگەها دهۆكێ و زانكۆیا دهۆك و زانكۆیا پۆلیتەكنیك یا دهۆكێ كو ئەڤ پرۆژە دێ ب سەرپەرشتیا زانكۆیا (Sassari) یا ئیتالی و ب رێكخستنا رێكخراوا AISPO یا ئیتالی هێتە ئەنجامدان بۆ پێشڤەبرنا فێركرنا پەرستاری و چارەسەریا سروشتی.
د كۆمبوونێ‌ دا كو ل رێڤەبەریا گشتی یا ساخلەمیێ هاتیە ئەنجام دان هەر ئێك ژ د. لقمان هادی حسن هاریكارێ‌ سەرۆكێ‌ زانكۆیا دهۆك بۆ كاروبارێن زانستی و خاندنا بلند و د. ئەفراسیاب موسا رێڤەبەرێ‌ گشتی یێ‌ ساخلەمیا پارێزگەها دهۆكێ‌ دگەل نوینەرێ‌ كۆلیژێن زانستێن تەندروستی و پەرستاری و پزیشكی و نوینەرێ‌ زانكۆیا پۆلیتەكنیك بەرهەڤببوون، ژ بۆ دیاركرنا رازیبوونێ‌ بۆ دەستپێكرنا پرۆژەی، پشتی رونكرنا پرۆژەی ژلایێ رێكخراوا AISPO یا ئیتالی و ساخلەمیا دهۆكێ، رازیبوون هاتە دان ژ بۆ دەستپێكرنا پرۆژەی و ل نێزیك دێ رێككەفتنەكا لێكتێگەهشتنێ هێتە ئیمزاكرن دناڤبەرا ڤان لایەنان دا بۆ دەستپێكرنا پرۆژەی، كو ئارمانج ژێ‌ پێشڤەبرنا بەرنامێ فێركرنا پەرستاری و چارەسەریا سروشتی یە ل زانكۆیێن دهۆك و پۆلیتەكنیك یا دهۆك و بۆ ماوێ سێ سالان ئەڤ پرۆژە دێ یێ‌ بەردەوام بیت.