ژ بۆ هایداربوون ل سەر رەوشا كۆلیژا پەروەردا بنیات ل ئامێدیێ، سەرۆكێ زانكۆیا دهۆك، د. داود سلیمان ئەتروشی، ل رۆژا 21/11/2021 سەرەدانا دەڤەرا ئامێدیێ كر.
دڤێ سەرەدانێ دا كو هاریكارێ سەرۆكێ زانكۆیێ بۆ كاروبارێن كارگێری و دارایی، د. ئەحمەد محەمەد سالح، ژی دگەلدا بوو، دگەل جڤاتا كۆلیژێ كومبوون، ل دەسپێكا كۆمبوونێ، د. كەرەڤان محەمەد، راگرێ كۆلیژێ كێماسی و ئاریشیە و پێدڤیێن كۆلیژێ بەحس كرن، ژوانا كێمیا هۆلێن خاندنێ، دیسا كێمیا ستافێ زانستی و فەرمانبەران، ل دویف گۆتنا وی ئێك ژ ئاریشێن ڤێ كۆلیژێ یە هەر ژ دەستپێكا دامەزراندنێ و هەتا نوكە، هەروەسا نەبوونا ئاڤاهیەكێ سەردەمیانە.
سەرۆكێ زانكۆیا دهۆك، د. داود ئەتروشی دیاركر كو هەر ژ رۆژا دەستبكاربوونێ وەكو سەرۆكێ زانكۆیا دهۆك جەخت ل سەر سێ خالێن سەرەكی كریە ل زانكویێ بگشتی، ئەو ژی زێدەكرنا شیانێن دەرچوویێن زانكۆیێ ب گشتی نەخاسمە یێن پەروەردا بنیات، چونكو بەرهەمئینانا مامۆستایانە، لەوما پێدڤیە مامۆستایەكێ خودان شیان و ب زانستەكێ بەرز پێشكێشی جڤاكی بكەت، دیسا ئەو ڤەكۆلینێن زانستی یێن دهێنە ئەنجامدان پێدڤیە پتر خزمەتا جڤاكی بكەن، ب تایبەتی ژیانا رۆژانە، چونكو زانكۆ تەمامكەرێن جڤاكی نە، و مەنهەجێ زانكۆیێ پێدڤی پێداچوونێ یە، لەوما ب پشتەڤانیا ستافێ زانكۆیێ ب گشتی دێ رویەكێ شارستانی تر دەینە زانكۆیێ.
د. داود ئەتروشی هەروەسا گۆت ئەم خودان مامۆستا و ستافەكێ خودان شیانین لەورا مە بریار دایە ب زێدەكرنا دەمژمێرێن دەواما زانكۆیێ چونكو مەرجە ماموستا 30 دەمژمێران دەوامێ بكەت ل دیف خشتێ بۆ دهێتە دیاركرن هەر ژ دەمژمێر 8:30 سپێدێ حەتا 5:30 ئێڤاری دا پتر سیمایێ زانكۆیێ پێڤە دیاربیت بشێت پتر خزمەتا جڤاكی بكەت.
ژلایێ خۆ ڤە هاریكارێ سەرۆكێ زانكۆیا دهۆك د. ئەحمەد محەمەد سالح دڤێ كۆمبوونێ دا گۆت" بخۆشحالیڤە نوكە دەلیڤە دایە مە ب خەرج كرنا هندەك داهاتێ زانكۆیێ، ئەڤە ژی دێ بیتە رێخۆشكەرەك كو كۆمەكا پێدڤیێن ڤێ كۆلیژێ ژی دگەل یێن زانكۆیێ بگشتی بهێنە دابین كرن.
هەر ل دەڤەرا ئامێدیێ سەروكێ زانكۆیا دهۆك و شاندێ دگەل دا سەرەدانا چەند سازیێن وێ دەڤەرێ كر، و سۆپاسیا وان كر بۆ پشتەڤانیا وان یا بەردەوام بۆ ڤێ كۆلیژێ، و دگەل قایمقامێ قەزا ئامێدیێ، وارشین سەلمان، جەخت ل سەر دیاركرنا پارچە ئەردەكێ بەرفرەه كرن ژبۆ دروستكرنا ئاڤاهیەكێ نوی بۆ كۆلیژێ.