قوتابیێن پشکێن ناڤخۆیی دگەل سەرۆکاتیا زانکۆیا دهۆک فتارێ دکەن
إبريل 18, 2022, 1:56 ص

 

ئەڤرۆ سەرۆکاتیا زانکۆیا دهۆک ل ناڤەندا قوتابیان فتارەکا بەرفرەهـ هاتە بەرهەڤکرن بو زێدەتر ژ ١٦٠٠  قوتابیین کچ یێن پشکێن ناڤخۆیی، لبەرە ژی سوباهی بۆ زێدەتر ژ ٢٠٠٠ قوتابیێن کور یێن پشکێن ناڤخۆیی یێن زانکۆیا دهۆک ل هەمان جهـ بهێتە دانان.

 

 

د ڤێ خرڤەبوونێ دا و ب ئامادەبوونا سەرۆکێ زانکویێ و هەرسێ هاریکارێن سەرۆکێ زانکۆیێ و هژمارەکا راگر و رێڤەبەر وبەرپرسێن یەکەین ئیداری و زانستی یێن زانکۆیا دهۆک، سەرۆکێ زانکۆیێ د. داوود سلێمان ئەترووشی بەری بەرەبانگێ فتارێ پەیڤەک پێشکێشی قوتابیان کر و تێدا گۆت: "خۆشترین فتارە ئەوە مرۆڤ دگەل خێزانێ بکەت، بلا هوین هزرنەکەن هوین دویری خێزانێنە و زانکۆیا دهۆک مالا هەوەیە، دویربوونا هەوە ژ دایک و باب و خویشک و برایان بۆ خواندنێ و خۆ ئاڤاکرنێیە، ئەم و قوتابیێن مە ئێک خێزانین، لەورا مە ب فەر دیت ئەڤرۆ ئەم و هوینێن خۆشتڤی پێکڤە فتارێ بکەین".

 

 

د درێژیا پەیڤا خۆ دا  سەرۆکێ زانکۆیا دهۆک ئاماژە دا گرنگیا قوتابی بۆ زانکۆیێ و گۆت:  "هوین جهێ گرنگیا زانکۆیێنە، ئەو قوتابیین د پشکێن ناڤخۆیی دا دژین باش دزانن سەرۆکاتیا زانکۆیێ لدویڤ شیانان پێدڤیێن هەوە دابینکرینە، زانکۆیێ لدویڤ شیانان خەمساری نەکریە، لەورا سوپاسیا رێڤەبەرێ پشکێن ناڤخۆیی و ستافێ دگەلدا دکەین بۆ کارێ وان".

 

 

سەرۆکێ زانکۆیێ باس ل گورانکریێن قۆناغێن داهاتی ل زانکۆیا دهۆک کر و دیارکر "زانکۆیا دهۆک یا بەرەڤ گورانکاریێن کارگێری و زانستی دچیت، مەرەم ژ ڤان گورانکاریان خزمەتا هەوەیێن خۆشتڤیە، مە ل پاشەرۆژێ قوتابیەکێ زانا و بەرهەمئێنەر و ئاڤا و زانا بۆ ڤی وەلاتی دڤێت، بلا قوتابی ڤان سالێن دگەل مە، هەمی هێزا خۆ بدەنە کاری داکو بەرهەمەکێ پێشکێشی ڤی وەلاتی بکەت، و بلا ژبیرنەکەین ئەڤ خۆشی و ئێمناهیا ئەم و هوین تێدا بەرهەمێ خوینا شەهیدا و قەهرەمانیا پێشمەرگێ جانفیدا و دەزگەهێن ئێمناهیێ ل هەرێمێ و رۆلێ وان یێ بەرچاڤە، لەورا ئەم هەمی  یێن دخەما پاشەرۆژا ڤی وەلاتی دا و هوین پاشەرۆژا ڤی وەلاتینە، داخوازێ ژ هەوە دکەم هوین ژی دگەل مە وێ خەمێ راکەن دا بشێین پێکڤە ڤی وەلاتی سەربێخین".