ب مەرەما ژ نێزیک هایداربوونێ ل دۆر ئاوایێ برێڤەچوونا کاری و پێدڤیێن گرنگ بۆ پتر پێشڤەچوونا بزاڤا ئەکادیمی و کارگێری ل زانکۆیا دهۆک و هەلسەنگاندنا مەیدانی یا ئاوایێ برێڤەچوونا تاقیکرنان و وەرگرتنا تێبینیێن قوتابی و مامۆستایان، ئەڤرۆ رێکەڤتی ٧/٦/٢٠٢٢ سەرۆکێ زانکۆیا دهۆک د. داود سلێمان ئەتروشی و دگەلدا د. لوقمان هادی حەسەن هاریکارێ سەرۆکێ زانکۆیێ بۆ کاروبارێن زانستی، سەرا کۆلیژا ئەندازیاری، کۆلیژا زمانان و پەیمانگەها چارەسەریا دەروونی و چارەسەریا تراومایێ دا و دیدارێن جودا دگەل راگر و مامۆستا و قوتابیێن وان ئەنجامدان.
د ڤێ گەریانا مەیدانی دا، سەرۆکێ زانکۆیێ گرنگی دا گوهداریا تێبینیێن قوتابیان و هژمارەکا پرسیاران لدۆر ئاوایێ برێڤەچوونا پرۆسێسا خواندنێ و سەقایێ فێربوونێ و تاقیکرنا ئاراستەی قوتابیان کرن و پاشی ب هویری گوهداریا هەلسەنگاندن و تێبینیێن وان کر. پاشی سەرۆکێ زانکۆیا دهۆک دوپاتکر کو پێدڤیە قوتابی سەنتەر بیت و گرنگترین رەگەز د پلان و سیاسەتێن نوی یێن زانکۆیا دهۆک دا قوتابیە.