پشتی وەرزشا زانكۆیا دهۆك شیای د هژمارەكا یاریێن وەرزشی دا ل سەر ئاستێ زانكۆیێن پارێزگەهێ و هەرێمێ پلێن باش بدەستڤەبینن، ئەڤرۆ رێكەڤتی ٢٧/٧/٢٠٢٢ و ل هۆلا خانی ل سەرۆكاتیا زانكۆیا دهۆک و ب ئامادەبوونا سەرۆكێ زانكۆیێ د. داود سلێمان ئەتروشی و د. ئەحمەد قاسم راگرێ كولیژا پەروەردا جەستەیی و زانستێن وەرزشی و د. فەلاح سەعدوون، رێڤەبەرێ وەرزشا زانکۆیا دهۆک، وەرزشڤانێن پشكداری د خول و قارەمانیێن وەرزشی دا كرین و تێدا سەرکەڤتین ژ لایێ سەرۆکاتیا زانکۆیا دهۆک ڤە هاتنە خەلاتکرن.
د پەیڤەكێ دا د. فەلاح سەعدوون رێڤەبەرێ وەرزشا زانكۆیا دهۆك گۆت "ب سوپاسی ڤە پشتی بریار ژ لایێ سەرۆكاتیا زانكۆیێ ڤە هاتیەدان ب گوهۆرینا یەكا وەرزشی یا زانكۆیێ بۆ رێڤەبەریا وەرزشا زانكۆیێ، ژبەر گرنگیا وەرزشێ ئەم شیاین د ئەڤ سالەدا د كۆمەكا یاریێن وەرزشی ل سەر ئاستێ زانكۆیین پارێزگەهێ و هەرێمێ پلێن باش بدەستخۆڤە بینین، ژ وان ژی یاریا شەترنجێ یا قوتابیێن كور و كچ رێزا ئێكێ و باسكت بۆلا كورا رێزا ئێكی و تەپا مێزێ یا مامۆستا و قوتابیێن كور رێزا ئێكی و باسكت بۆلا كچا ل رێزا دووێ بین".
راگرێ كولیژا پەروەردا جەستەیی و زانستێن وەرزشی د. ئەحمەد قاسم ئاماژە دا گرنگیا وەرزشا زانكۆیێ كو ئێك ژ خالێن گرنگە بۆ رێزبەندیا زانكۆیان و دەستخۆشی ل یاریزانێن پشكدار كر، هەروەسا ئامادەییا خۆ ژی نیشان دا وەكو كولیژ کو بەردەوام ببن بۆ پتر پێشئێخستنا وەرزشا زانكۆیا دهۆك.
ژ لایێ خۆ ڤە د. داود ئەتروشی سەرۆكێ زانكۆیا دهۆك دەستخۆشی و پیرۆزباهیێن سەرۆکاتیا زانکۆیێ ئاراستەی هەمی یاریزانان کر و راگەهاند "ئەڤرۆ گرنگیاوەرزش و هونەری ژ چ بوار و زانستێن دی کێمتر نینە و ئەم ل زانکۆیا دهۆک گرنگیەکا مەزن پێ ددەین و بزاڤێ دکەین پتر پێشڤەببەین. هیڤیا سەرکەڤتنێن بەردەوام بۆ هەوە دخوازین پیروزباهیێ ل هەوە و زانكۆیا دهۆك دكەین".
ل دویماهیا ڤان رێورەسمان، هەمی یاریزانێن سەرکەڤتی دگەل راهێنەر و سەرپەرشتێن وان ژ لایێ سەرۆکێ زانکۆیێ ڤە هاتنە خەلاتکرن.