سیستەمێ ئەلکترۆنیێ رێڤەبرنا زانکۆیا دهۆک د قووناغێن دویماهیێ دایە
Oct. 4, 2022, 8:41 p.m.

3ـی ئکتۆبەرا 2022ـێ

ب مەرەما پتر پێشڤەبرنا سیستەمێ ئەلکترۆنیێ زانکۆیا دهۆک، لژنا بلندا سەرپەرشتیکرنا سیستەمێ ئەلکترۆنیێ رێڤەبرنا زانکۆیێ University Management System، ب ئامادەبوونا د. لوقمان هادی حەسەن، هاریکارێ سەرۆکێ زانکۆیا دهۆک بۆ کاروبارێن زانستی، د. سەرهاد مستەفا ئادەم رێڤەبەرێ دلنیایی جۆری، د. ئسماعیل ئەمین سەرپەرشتی یەکەیا پێڤاژۆیا بۆلۆنیا و هاریکار فەیسەل خێروللا رێڤەبەرێ تەکنۆلۆلۆجیا پێزانینان ل زانکۆیا دهۆک، کۆمبوونەک ب شێوەیێ ئۆنلاین دگەل کۆمپانیا ئەورۆسۆفت ئەنجامدا.

د. سەرهاد ئادم گەلەک ب گرنگی ڤە باس ل سیستەمێ ئەلکترۆنیێ رێڤەبرنا زانکۆیێ کر و گۆت "سیستەمێ ئەلکترۆنیێ رێڤەبرنا زانکۆیێ ژ لایێ کۆمپانیا ئەورۆسۆفت ڤە هاتیە رادەستکرن و ژلایێ لژنا بلندا سەرپەرشتیکرنا سیستەمێ ئەلکترۆنی ڤە د قووناغا تێستێ دایە، ژ بەرکو ئەڤ سیستەمە ژ گەلەک پشکان پێکهاتیە، ئەڤ چەندە ژی دێ گەلەک ئاسانکاریان بۆ قوتابی و فەرمانبەر و مامۆستایان کەت، ب تایبەتی مامۆستا دشێت ب شێوەکێ راستەوخۆ زانیاری و چالاکیێن خۆ تۆماربکەت، ئەڤ چەندەژی ئاسانکاریێن زێدەتر دکەت ب تایبەتی ل دەمێ ئەنجامدانا راپرسینا ل زانکۆیێ".

ژ لایێ خۆ ڤە هاریکار فەیسەل راگەهاند "د کۆمبوونێ دا گەنگەشەکا تێروتەسەل لدۆر سیستەمێ ئەلکترۆنیێ رێڤەبرنا زانکۆیێ هاتەکرن و چەندین تێبینی و پێشنیارێن نوی لدۆر ڤی سیستەمێ ژ لایێ ئەندامێن لژنا بلند و کۆمپانیا ئەورۆسۆفت ڤە هاتنە پێشکێشکرن"، هاریکار فەیسەل گۆت ژی "لژنا بلند داخواز ژ کۆمپانیا ئەورۆسۆفت کر چەندین پشکێن نوی بۆ سیستەمی بهێنە زێدەکرن، کۆمپانیا ئەورۆسۆفت ژی ئامادەییا خۆ بۆ هەر تێبینی و پێشنیارەکا لژنا بلند دیارکر".

جهێ ئاماژەپێکرنێ یە، کۆمپانیا ئەورۆسۆفت نێزیکی سالەکێ یە کار ل سەر دروستکرنا سیستەمێ ئەلکترۆنیێ رێڤەبرنا زانکۆیا دهۆک دکەت، د نوکە دا ئەڤ سیستەمێ ئەلکترۆنی د قووناغێن دویماهیێ یێن کارکرنێ دایە.