قوتابیێن زانکۆیا تەکنیکی یا دۆرتموند سەرەدانا خۆ بۆ زانکۆیا دهۆک بدویماهیئینا
Nov. 25, 2022, 9:45 p.m.

راگەهاندنا زانکۆیا دهۆک؛ ٢٥ـی چریا دووێ ٢٠٢٢

قوتابیێن بەکالۆریۆسێ یێن کولیژا پلاندانانێ ل زانکۆیا تەکنیکی یا دۆرتموند یا ئەلمانی، پشتی دوو حەفتی و د چارچۆڤێ پرۆژەکێ هەڤپشک دا ل کولیژا پلاندانانا جهەکی ل زانکۆیا دهۆک دەربازکرین، دوهی دگەل سەرۆکێ زانکۆیا دهۆک د. داود سلێمان ئەتروشی کۆمبوون و ئەڤرۆ ب ئەزمۆن و شارەزاییەکا نوی بەر ب وەلاتێ خۆ برێکەڤتن.

د کۆمبوونەکێ دا ل سەرۆکاتیا زانکۆیا دهۆک، و ب ئامادەبوونا د. داود سلێمان ئەتروشی، سەرۆکێ زانکۆیا دهۆک و د. رەند حەمۆدی، رێڤەبەرا ئۆفیسا پەیوەندیێن ناڤدەولەتی ل زانکۆیا دهۆک و د. لەیلا محەمەد رەسوول، راگرا کولیژا پلاندانانا جهەکی ل زانکۆیا دهۆک و دگەل هەردوو مامۆستایێن زانکۆیا تەکنیکی یا دۆرتموند، یێن سەر ب ڤی پرۆژێ هەڤپشک ڤە، د. حەسەن سینەمیللی ئۆغلۆ و د. یوهانس لوکنکاتەر و قوتابیێن کولیژێن پلاندانانا جهەکی یێن هەردوو زانکۆیێن ناڤهاتی، دانوستاندن ل دۆر ناڤەرۆکا ڤێ سەرەدانێ و ئەو زانین و شارەزییا ژ لایێ قوتابیان ڤە هاتیە وەرگرتن، هاتنە کرن.

سەرۆکێ زانکۆیا دهۆک د ڤێ کۆمبوونێ دا باس ل کەتوار و دیرۆکا هەرێما کوردستانێ و پارێزگەها دهۆکێ و رۆلێ وەلاتێ ئەلمانیا هەر ژ دەستپێکا پەیدابوونا هەرێما کوردستانێ و تا نوکە کر و دیارکر "وەلاتێ ئەلمانیا بەردەوام پشتەڤان بوویە و نوکە ژی رێکخراوێن GIZ و DAAD باشترین نموونەنە بۆ ڤێ پشتەڤانیێ، لەورا وەلاتێ ئەلمانیا هەژی سوپاسیێ یە بۆ ڤێ پشتەڤانیا مەزن".

د. داود ئەتروشی باس ل گرنگیا سەرەدانا شاندێ زانکۆیا تەکنیکی یا دۆرتموند بۆ کەمپێن ئاوارە و پەنابەران ل پارێزگەها دهۆکێ کر و دیارکر "کاودانێ کەمپێن پەنابەر و ئاوارەیان ل هەرێما کوردستانێ ب گشتی و ل پارێزگەها دهۆکێ ب تایبەتی، ئەزمۆنەکا تایبەت و جودایە، هەر ل دەستپێکرنا کۆچکرنێ؛ حکۆمەت و وەلاتیێن هەرێما کوردستانێ پێشوازیا لێ کر و هەمی هاریکاریێن پێدڤی بۆ پێشکێشکرن و ل مال و بارەگایێن خۆ ڤەحەواندن و هژمارەکا زۆرا کەمپان بۆ دروستکرن و مافێ کارکرن هەلبژارتنا جهی دا هەمیان، کو ئەڤە ئەزمۆنەکا گەلەک تایبەتە و ب دەگمەن دهێتە دیتن".

ژ لایێ خۆ ڤە د. حەسەن سینەمیللی ئۆغلۆ، مامۆستایێ زانکۆیا تەکنیکی یا دۆرتموند و پشکدار د ڤی پرۆژێ هەڤپشک دا، راگەهاند "ئەم گەلەک ب شانسین نوکە ئەم ل زانکۆیا دهۆکین، ئەڤێ سەرەدانێ گەلەک زانین و شارەزایی پێشکێشی مە و قوتابیێن مە کر، هەمی هیڤیێن مە ئەون ئەڤ پرۆژە بەردەوام و فراوانتر لێ بهێت".

هەر د ڤێ کۆمبوونێ دا، مامۆستایێ زانکۆیا تەکنیکی یا دۆرتموند، د. یوهانس لوکنکاتەر، وەکو ئێک ژ مامۆستایێن پشکدار د ڤی پرۆژێ هەڤپشک دا، سەرسامیا خۆ ب ڤێ سەرەدانێ دەربڕی و گۆت "زانکۆیا دهۆک و مامۆستایێن وێ گەنجینەنە و مە گەلەک زانین و شارەزایی ژێ وەرگرت". هەروەسا ل دۆر پێشڤەچوون و ئاڤەدانیا کوردستانێ ب گشتی و پارێزگەها دهۆکێ ب تایبەتی خویاکر "ئەڤ پێشڤەچوونا ل ڤێرێ دروستبووی دیاردەیە! سەرەرای هندێ کو ئەڤ هەرێمە د چەندین کاودانێن سەخت دا دەربازبوویە، لێ ئەڤ کار و ئاڤەدانیا ل ڤێرێ دروستبووی گەلەک مەزن و کێم وێنەیە".

ئێک ژ بەرهەڤبوویێن ڤێ کۆمبوونێ، کو رۆلەکێ مەزن د دروستکرنا پەیوەندیێن ناڤدەولەتیێن زانکۆیا دهۆک دا گێرایە، رێڤەبەرا نڤێسینگەها پەیوەندیێن ناڤدەولەتی یێن زانکۆیا دهۆک، د. رەند حەمۆدی بوو. د. رەندێ بۆ پشکدارێن کۆمبوونێ باس ل پرۆژە و بەرنامەیێن ناڤدەولەتیێن زانکۆیا دهۆک کر، ب تایبەتی دگەل زانکۆیێن ئەلمانی و گۆت "مە بەرنامە و پرۆژە و هەماهەنگی دگەل هژمارەکا زۆرا زانکۆیێن ئەلمانی هەنە، کو ئەڤە بوویە ئەگەر کو ترافیکەکا زۆر مە دگەل وەلاتێ ئەلمانیا هەبیت و بەردەوام هاتنوچوون د ناڤبەرا مە دا هەیە، لێ سەرەرای ڤێ یەکێ، پەیوەندیا مە د گەل ل زانکۆیا تەکنیکی یا دۆرتموند گەلەک تایبەت و خۆجهە، پەیوەندیا زانکۆیا دهۆک و زانکۆیا تەکنیکی یا دۆرتموند چیرۆکەکا سەرکەڤتنێ یە".

د. لەیلا محەمەد رەسوول، راگرا کولیژا پلاندانانا جهەکی ل زانکۆیا دهۆک، کو ئەڤ کولیژە بەرهەمێ ڤی پرۆژەی یە، د کۆمبوونێ دا گەلەک ب گەشبینی باس ل ڤی پرۆژێ هەڤپشک کر و گۆت "ب ئێکەم سەرەدانا قوتابیێن بەکالۆریۆسێ ژ زانکۆیا تەکنیکی یا دۆرتموند گەلەک شاناز و کەیفخۆشین، هەیڤا بهێت ژی، قوتابیێن مە یێن خواندنا بلند و د چارچۆڤێ ڤی پرۆژەی دا دێ سەرەدانا ل زانکۆیا تەکنیکی یا دۆرتموند کەن و بۆ ماوێ سێ حەفتیا دێ ل وێرێ مینن، ئەڤە ژی نیشانەکا پێشڤەچوونا ڤی پرۆژێ هەڤپشکە، کو ئەڤ پرۆژە نە د سالەکێ دا دروستبوویە، بەلکو ئەڤە بەرهەمێ کارکرنا ٢٢ سالانە. پشتراستم ئەڤ پرۆژێ کێم وێنە دێ گەلەک فراوان بیت، نە بتنێ ل هەرێما کوردستانێ، بەلکو ل سەرانسەری عیراقێ و دەڤەرێ ب گشتی".

خویایە بۆ ئێکەم جارە قوتابیێن بەکالۆریۆسێ، کو ل قۆناغا سێیێ نە، ژ زانکۆیا تەکنیکی یا دۆرتموند بۆ زانکۆیا دهۆک دهێنە هنارتن، کو ئەڤرۆ سەرەدانا ١٣ قوتابیێن ئەلمان بۆ زانکۆیا دهۆک ب دویماهی هات. پێشوەخت ژی پرۆژێن وان هاتینە ئێکگرتن و ب رێکا ئونلاین دانوستاندن د ناڤبەرا قوتابیێن هەردوو زانکۆیا هەبوون، لێ د ڤێ سەرەدانێ دا، بۆ ماوێ دوو حەفتیا ل ئێک هۆل پرۆژێن خۆ یێن هەڤپشک گەنگەشەکرن و پێشئێخستن، ب سەرپەرشتیا ژمارەکا مامۆستایێن ئەلمانی و کوردستانی.

دهێتە زانین زانکۆیا تەکنیکی یا دۆرتموندا ئەلمانی ل سالا ١٩٦٨ـێ هاتیە دامەزراندن و ئێکەم سەرۆکێ وێ مارتن شمایسەر Martin Schmeisser بوو و ئێکەم سمینار هاتیە گۆتن ل پۆلا کیمایێ بوو ل سالا ١٩٦٩ـێ، و ل سالا ٢٠٠٧ـێ بوویە زانکۆیەکا تەکنیکی و ژ ١٦ پشک و کولیژێن جودا پێکدهێت، کو پلاندانان ئێک ژ وانە.