وەزیرێ كاروبارێن نێڤدەولەتی یێ هەرێما براندنبۆرگ یا ئەلمانی (Martin Gorholt) و شاندەكێ ل گەل دا سەرەدانا زانكۆیا دهۆك كر و ژلایێ سەرۆكێ زانكۆیێ پرۆفیسۆر د. مصلح دهۆكی پێشوازی لێ هاتە كرن.
د كۆنگرەكێ رۆژنامەڤانی دا سەرۆكێ زانكۆیا دهۆك دیار كر كو مەرەما هاتنا شاندێ ئەلمانی بۆ زانكۆیا دهۆك ژ بۆ وێ چەندێ یە ژ نێزیك رەوشا خاندنێ ل زانكۆیێ ببینن و ب تایبەتی ل پەیمانگەها چارەسەریا دەروونی و چارەسەریا تراومایێ كو ب هەڤكاریا زانكۆیا (تـوبیگـن) ل ویلایەتا (بادن ڤـورتـمبێرگ) یا ئەلمانی هاتیە ڤەكرن و ئاشكرا كر كو داخاز ژ شاندێ ئەلمانی كریە د هاریكار بن كو ئەڤ پەیمانگەهە ببیتە كۆلیژەك و ل هەرسێ قوناغا (بەكالوریۆس، ماستەر و دكتۆرایێ) قوتابیان وەربگرن.
هەر د كۆنگرێ رۆژنامەڤانی دا وەزیرێ كاروبارێن نێڤدەولەتی یێ هەرێما براندنبۆرگ یا ئەلمانی دیاركر كو بۆ ماوێ پێنج رۆژانە سەرەدانا هەرێما كوردستانێ كری و ئەڤرۆ ل زانكۆیا دهۆكن داكو ژ نێزیك رەوشا خاندنێ ل ل پەیمانگەها چارەسەریا دەروونی و چارەسەریا تراومایێ ببینن.
هەر د ڤێ دیدارێ دا سەرۆكێ زانكۆیا دهۆك پرۆفیسۆر د. مصلح دهۆكی لۆگویێ زانكۆیا دهۆك پێشكێشی وەزیرێ كاروبارێن نێڤدەولەتی یێ هەرێما براندنبۆرگ یا ئەلمانی كو و هەروەسا وەزیری ژی دیاریەك پێشكێشی سەرۆكێ زانكۆیا دهۆك كر و ل دویف دا سەرەدانا هۆلێن خاندنێ ل ڤێ پەیمانگەهێ كرن.