The General Consulate of Islamic Republic of Iran has visited UoD
May 31, 2017, 7:11 p.m.

قونسلێ‌ گشتیێ‌ وەلاتێ‌ كومارا ئیسلامیا ئیرانێ‌ ل هەولێرێ‌ مورتەزا عەبادی ب سەرۆكاتیا شاندەكێ‌ قونسلخانا ئیرانێ‌ ل هەولێرێ‌ ل رۆژا 31/5/2017 سەرەدانا سەرۆكاتیا زانكۆیا دهۆك كرن و ژلایێ‌ سەرۆكێ‌ زانكۆیا دهۆك پرۆفیسۆر د. موسلح دهۆكی هاتە پێشوازی كرن. 

د روونشتنەكی دا سەرۆكێ‌ زانكۆیا دهۆك خۆشحالیا خۆ ب ڤێ‌ سەرەدانێ‌ دیاركر و بەرهەڤیا زانكۆیا دهۆك بۆ گرێدانا پەیوەندیان ل گەل زانكۆیێن وەلاتێ‌ ئیرانێ‌ دیاركر.

ژ لایێ‌ خۆ ڤە مورتەزا عەبادی قونسلێ‌ گشتیێ‌ وەلاتێ‌ كومارا ئیسلامیا ئیرانێ‌ ل هەولێرێ‌ دیاركر پەیوەندیێن زانكۆیان ئێكانە پەیوەندی نە كو هەمی ژێ‌ مفا دار بن، گۆت ژی هەتا نوكە 40 لێك تێگەهشتن دناڤبەرا زانكۆیێن هەرێمێ‌ و زانكۆیێن ئیرانی هاتینە مۆركرن و هندەك ژ وان چووینە دبیاڤێ‌ بجهئینانێ‌ دا و كار ل سەر دهێتە كرن.  

قونسلێ‌ كومارا ئیسلامیا ئیرانێ‌ دیاركر كو ئەگەر زانكۆیا دهۆك یا بەرهەڤ بیت دێ‌ پشكەكا باوەرناما هەڤپشك د ناڤبەرا زانكۆیا دهۆك و زانكۆیەكا ڤی وەلاتی ڤەكەن و باوەرناما هەڤپشك دەنە دەرچوویان، پرۆفیسۆر د. موسلح دهۆكی سەرۆكێ‌ زانكۆیا دهۆك بەرهەڤیا زانكۆیا دهۆك دیاركر بۆ ڤەكرنا ڤێ‌ پشكا زانستی ل زانكۆیا دهۆك و دیاركر كو دێ‌ ل گەل زانكۆیێن وی وەلاتی ئەوێن پەیوەندی ل گەل هەین دانوستاندنان كەن بۆ ڤەكرنا ڤێ‌ پشكا زانستی ب رێكا قونسلخانا ئیرانێ‌ ل هەولێرێ‌ كو دێ‌ زانكۆیا دهۆك و قوتابیێن مە ژ ڤێ‌ پەیوەندیێ‌ د مفاداربن.

سەرۆكێ‌ زانكۆیا دهۆك هەروەسا داخازا كورسیێن خواندنێ‌ بۆ دەرچوویێن زانكۆیا دهۆك ژ قونسلی كر، قونسلی ژی بەرهەڤیا خۆ دیاركر كو دێ‌ ل گەل زانكۆیێن وەلاتێ‌ خۆ ڤی بابەتی بەحس كەت بۆ وەرگرتنا قوتابیێن دهۆكێ‌ ل خواندنا بلند ل وەلاتێ‌ ئیرانێ‌.