ب مەرەما بەردەوامیدانێ ب بەرنامێ پێشڤەبرنا پەرستاریێ ل نەخۆشخانێن پارێزگەها دهۆکێ، شاندەکێ زانکۆیا ساساری یا ئیتالی رێکخراوا ئایسپۆ سەرەدانا زانکۆیا دهۆک کر و لابۆرەکا کومپیۆتەری ل کولیژا پەرستاری دانا و دانوستاندن لدۆر چەوانیا پێشڤەبرنا پرۆگرامێن خواندنێ ل کولیژێن پەرستاری و زانستێن تەندروستی ل زانکۆیا دهۆک کرن.
د چارچووڤێ بەرنامێ ناڤبری دا و ب ئامادەبوونا هاریکارێن سەرۆکێ زانکۆیا دهۆک د. لوقمان هادی حەسەن و د. ئەحمەد محەمەد سالح دگەل رێڤەبەرێ گشتیێ ساخلەمیا دهۆکێ د. ئەفراسیاب مووسا، لابۆرەکا کومپیۆتەری کو ژ ٢١ کومپیۆتەران پێکهاتی بوو، بۆ قوتابیێن کولیژا پەرستاری هاتە ڤەکرن، هەروەسا داتابەیسەکا ڤەکۆلینێن زانستی بۆ قوتابیان دابینکر، کو قوتابی بشێت وان ڤەکۆلینێن گرێدای پەرستاریێ یێن د گۆڤارێن زانستی دا ل جیهانێ بەلاڤبووین بدەستخۆڤەبینیت.
د. ئاری حەبیب، کو مامۆستایێ زانکۆیا دهۆکە و ئێکە ژ رێکخەرێن ڤی بەرنامەی، خویاکر "ئارمانجا سەرەکی یا ڤی بەرنامەی پێشڤەبرنا پرۆگرامێن خواندنێ یە ل هەردوو کولیژێن پەرستاری و زانستێن ساخلەمی ل زانکۆیا دهۆک و ب تایبەتی ژ لایێ پراکتیکی ڤە، بۆ نموونە، ل شوینا هەر ١٠ قوتابی بۆ کارێ پراکتیکی ل نەخۆشخانان دگەل ئێک پەرستار بن، دپلاندایە هەر ئێک قوتابی دگەل ئێک پەرستار بیت".
ژ لایەکێ دی ڤە، رێکخەرێ بەرنامەی راگەهاند "ئەڤ پرۆژە نە بتنێ بۆ پێشڤەبرنا پرۆگرامێن خواندنێ یە، بەلکو گەلەک لایەنێن دی ژی تێدا هەنە، وەکو ڤەکرنا لابۆران و دابینکرنا کەلوپەلان و رێکخستنا سەرەدانێن مەیدانی بۆ مامۆستایێن کولیژێن ناڤبری بۆ زانکۆیا ساساری و نەخۆشخانێن سانت رافائێل ل ئیتالیا".
هەژی باسکرنێ یە ئەڤ بەرنامە دەرئەنجامێ رێکەڤتنەکا لێکتێگەهشتنی یە کو ل هەیڤا ٧ یا سالا بۆری زانکۆیا دهۆک دگەل زانکۆیا ساساری واژووکربوو، کو زانکۆیا دهۆک ب هەماهەنگی دگەل رێڤەبەریا گشتی یا ساخلەمیا دهۆکێ و ب هەڤکاری دگەل زانکۆیا ساساری یا ئیتالی دێ ڤی بەرنامەی بۆ ماوێ ٣ سالان بجهئینیت. هەروەسا ئەڤ بەرنامە ب سپۆنسەریا رێکخراوا هەڤکاریا ئیتالی و ب رێکخەری و رێڤەبرنا رێکخراوا ئایسپۆ ل هەردوو کولیژێن پەرستاری و زانستێن تەندروستی ل زانکۆیا دهۆک دهێتە بجهئینان.