جڤاتا وەزارەتا خواندنا بلند و ڤەكۆلینێن زانستی ل حكومەتا هەرێما كوردستانێ و ب ئامادەبوونا ئەندامێن جڤاتێ ل رۆژا 8/3/2017 كۆمبوونەك ل سەنتەرێ رەوشەنبیری و جڤاكی یێ زانكۆیا دهۆك گرێدا.
د ڤێ كۆمبوونێ دا كو وەزیرێ خواندنا بلند و ڤەكۆلینێن زانستی د. یوسف گوران یێ ئامادەبوو، د پەیڤەكی دا سەرۆكێ زانكۆیا دهۆك پروفیسور د. مسلح دهۆكی خوشحالیا خو دیاركر بۆ ئەنجامدانا ڤێ كۆمبوونا جڤاتا وەزارەتێ ل باژێرێ دهۆكێ و هیڤی خواست كو ئەڤ جۆرە كۆمبوونە ل زانكۆیێن دیتر ژی یێن هەرێما كوردستانێ د بەردەوام بن داكو باشتر ژ نێزیك ژ رەوشا زانكۆیان ئاگەهدار ببن.
ل دویف دا وەزیرێ خواندنا بلند د پەیڤەكی دا دەست خوشی ل زانكۆیا دهۆك كر بۆ ڤێ مێڤانداریێ و دیاركر كو ئەنجامدانا ڤان كۆمبوونێن جڤاتا وەزارەتێ هەر جار ل زانكۆیەكی پشكەكە ژ بەرنامێ وەزارەتێ بۆ سەرەدانا زانكۆیان و گرنگی دان ب یەكسانیا زانكۆیان و ژ نێزیك ئاگەهدار بوون ژ كێشە و بزاڤێن زانكۆیان بۆ گەشەپێدانا وان د بیاڤێن جودا دا.