سەرۆکێ زانکۆیا دهۆک دگەل جڤاتا پارێزگەهێ کۆمبوو
Sept. 14, 2022, 9:26 p.m.

ئەڤڕۆ رێکەڤتی ١٤ـی ئەیلولا ٢٠٢٢ـێ، ل جڤاتا پارێزگەها دهۆکێ، پێشوازی ژ لایێ سەرۆکێ جڤاتێ ڤە ل شاندێ زانکۆیا دهۆک، ب سەرۆکاتیا د. داود سلێمان ئەتروشی سەرۆکێ زانکۆیا دهۆک هاتەکرن.

د کۆمبوونەکێ دا و ب ئامادەبوونا فەهیم عەبدوللا حەمو، سەرۆکێ جڤاتا پارێزگەها دهۆکێ و 19ئەندامێن جڤاتێ، خۆشحالی خۆ ب ئامادەبوونا سەرۆکێ زانکۆیا دهۆک و شاندێ دگەلدا دەربڕی، سەرۆکێ جڤاتا پارێزگەهێ گۆت "هەبوونا پەیوەندیێن باش د ناڤبەرا زانکۆیێ و جڤاتا پارێزگەهێ دا دبیتە ئەگەرێ پەیداکرنا چارەسەریێن زانستی و ئەکادیمی بۆ زۆربەیا وان ئاریشێن هەین، ب تایبەتی وان ئاریشێن زانکۆیا دهۆک ڤەکۆلینان لدۆر ئەنجامددەت"، هەروەسا هیڤیا سەرکەڤتنێ بۆ زانکۆیا دهۆک خواست وەکو (زانکۆیا دایک) ل پارێزگەها دهۆکێ.

لدویڤدا، د. داود سلێمان ئەتروشی سەرۆکێ زانکۆیا دهۆک، سوپاسیا دەستەیا سەرۆکایەتی و ئەندامێن جڤاتا پارێزگەها دهۆکێ کر بۆ پێشوازیا وان یا گەرم ل شاندێ زانکۆیا دهۆک، پاشی د پەیڤەکێ دا، ب هویری و زەلالی و تێروتەسەلی باس ل کەتوارێ زانکۆیا دهۆک و کارێن هاتینە ئەنجامدان و پلان و ستراتیژیێن سەرۆکاتیا زانکۆیا دهۆک هەین کر و راگەهاند "پەروەردە و چاندن ژ بوارێن هەرەگرنگێن زانکۆیا دهۆکن، ژبەرکو پەروەردەکا ساخلەم، جڤاکەکێ ساخلەم بەرهەمدئینیت، هەروەسا پێدڤیە ئەم زێدەتر گرنگیێ ب چاندنێ بدەین ژبەرکو ئاخ و ئاڤ و کەشوهەوایێ کوردستانێ بۆ چاندنێ گەلەکێ گونجایە، ئەڤەژی دبیتە ئەگەرێ پەیداکرنا ژێدەرەکێ دیێ داهاتی بۆ حکومەتا هەرێما کوردستانێ".

پاشی سەرۆکێ جڤاتا پارێزگەهێ رێ ب ئەندامێن جڤاتێ دا بۆ ئاراستەکرنا پرسیاران بۆ سەرۆکێ زانکۆیێ و شاندێ دگەلدا، ژ گرنگترین تەوەرێن پرسیار لدۆر هاتینە ئاراستەکرن بۆ سەرۆکێ زانکۆیێ (ئەنجامدانا ڤەکۆلینان، شێوازێ جلوبەرگێن قوتابیان، بابەتێ ترافیکی د ناڤ کەمپا زانکۆیێ دا، پشکێن نافخۆیی، چەوانیا پەیداکرنا دەلیڤێن کاری بۆ دەرچوویان، نەمانا خواندنا ئێڤاران ل زانکۆیێن حکومی) و هندەک بابەتێن دی.

سەرۆکێ زانکۆیێ و شاندێ دگەلدا گەلەک ب هویری و زانستیانە بەرسڤا پرسیارێن ئەندامێن جڤاتا پارێزگەها دهۆکێ دا و هیڤی خواستن هەماهەنگیەکا باشتر د ناڤبەرا زانکۆیا دهۆک و جڤاتا پارێزگەهێ دا هەبیت.

هەروەسا د. ئەحمەد محەمەد سالح، هاریکارێ سەرۆکێ زانکۆیێ بۆ کاروبارێن گارگێری و دارایی، د. مزگین محەمەد حەسەن، راگرێ کولیژا زانستێن مرۆڤاتی، د. دلشاد ئەبدولجەبار حەلیم، راگرێ کولیژا پلاندانانێ جهەکی، وەکو ئەندامێن شاندێ زانکۆیا دهۆک، باس ل بەرەڤپێشچوون و پلان و ستراتیژیێن نوی یێن زانکۆیا دهۆک و پەیوەندیێن فراوانێن زانکۆیێ دگەل زانکۆیێن بیانی بۆ پتر پێشخستنا ئاستێ زانستی و ئەکادیمی ل زانکۆیا دهۆک کر.