سەرۆکێ زانکۆیا دهۆک پێشوازی ل پەرلەمانتار و کاربدەستێن دەڤەرێن ماددێ ١٤٠ کر
Aug. 5, 2022, 2:29 p.m.

ئەڤرۆ رێکەڤتی ٤ی تەباخا ٢٠٢٢ـێ و ل سەرۆکاتیا زانکۆیا دهۆک، د. داود سلێمان ئەتروشی سەرۆکێ زانکۆیا دهۆک و ب ئامادەبوونا هاریکارێ سەرۆکێ زانکۆیێ د. لوقمان هادی حەسەن، پێشوازی ل شاندەکێ پەرلەمانتار و کاربدەستێن دەڤەرێن ماددێ ١٤٠ کر و د روینشتنەکێ دا دانوستاندن ل دۆر پێشکێشکرنا ئاسانکاریێن کارگێری بۆ دەرچوویێن زانکۆیا دهۆک یێن ژ دەڤەرێن ماددێ ١٤٠ هاتنە ئەنجامدان.

شاندێ ناڤبری، کو یێ پێکهاتی بوو ژ هەردوو ئەندامێن جڤاتا نوینەرێن عیراقێ شێروان دوبەردانی و د. ماجد شنگالی و هەروەسا سەید سەفوان گەرگەری راوێژکارێ جڤاتا نوینەرێن عیراقێ و د. ئەحمەد دوبەردانی هاریکارێ رێڤەبەرێ ساخلەمیا نەینەوا، داخواز ژ سەرۆکێ زانکۆیێ کر کو ئاسانکاریێن کارگێری بۆ دەرچوویێن ژ دەڤەرێن ماددێ ١٤٠، ئەوێن ژ گرۆپێ کولیژێن پزیشکی یێن زانکۆیا دهۆک دەرچووین، بکەن ب مەرەما دامەزراندنا وان ل سازیێن فەرمی یێن حکۆمەتا فیدرال.

ژ لایێ خۆ ڤە د. داود ئەتروشی بەرهەڤیا زانکۆیا دهۆک دیارکر بۆ هەر هاریکاریەکێ و بهێزکرنا هەماهەنگیێ دگەل سازیێن حکۆمەتا فیدرال ب مەرەما مفاوەرگرتنێ ژ شیانێن ڤان دەرچوویان و مفاداربوونا دەرچوویێن زانکۆیا دهۆک یێن وان دەڤەران.