وەزارەتا خواندنا بلند کۆمبوونەک لدۆر بهێزترکرنا پۆرتالێ خزمەت ئەنجامدا
Sept. 28, 2022, 1:16 p.m.

Sep 27, 2022

ب سەرپەرشتیا د. محەمەد حسێن سەرۆکێ دەزگەهێ سەرپەرشتی و دلنیایی جۆری، د. توانا نەجەف رێڤەبەرێ گشتیێ فەرمانگەها کارگێری و دارایی، و ب بەرهەڤیا نوینەرێن هەمی زانکۆیان، کۆمبوونەک لدۆر چەوانیا بەرفرەهکرنا خزمەتگوزاریێن وەزارەتا خواندنا بلند و زانکۆ و دامەزراوەیێن زانستی د پۆرتالا خزمەت دا، ل دیوانا وەزارەتا خواندنا بلند هاتەکرن.

د. محەمەد حسێن ئاماژە دا دیتنا وەزارەتێ دەربارەی ب ئەلکترۆنیکرنا هەمی خزمەتگوزاریان و راگەهاند "چەندین سالە وەزارەتا خواندنا بلند کار لسەر ئەلکترۆنیکرنا کاروبارێن وەزارەتێ دکەت د ڤی چارچووڤەی دا پێنگاڤێن گەلەک باش هاتنە هاڤێتن و دەستکەڤتێن مەزن ژی هەبووینە، د نوکە دا کار ل سەر بەرفرەهترکرنا پێشکێشکرنا خزمەتگۆزاریان دکەین د پۆرتالێ خزمەت یێ حکومەتا هەرێما کوردستانێ دا، بۆ ڤێ چەندێ ژی نوینەرێن زانکۆیان هاتینە راسپاردن کو هەولێن خۆ زێدەتر لێبکەن داکو د نێزیکترین دەم دا ئارمانجێن خۆ بدەستڤەبینین کو خزمەتکرنا وەلاتیانە."

هەروەسا د. توانا نەجەف د ڤێ کۆمبوونێ دا دیارکر "وەزارەتا خواندنا بلند هەمی شیانێن خۆ ئیخستینە کاری بۆ وێ چەندێ باشترین خزمەت د کێمترین دەم دا پێشکێشی وەلاتیان بکەت، ژ بەر ڤێ چەندێ وەزارەتا خواندنا بلند پێنگاڤ پێنگاڤ وان هەمی خزمەتگوزاریان ئەلکترۆنی دکەت".

ل دویماهیا کۆمبوونێ، نوینەرێن هەمی زانکۆ و سازیێن زانستی باس ل شێواز و چەوانیا دارشتنا کارنامەیێن خۆ ب شێوەکێ ئەلکترۆنی کر، بریار ئەوە د دەمەکێ نێزیک دا کار و خزمەتێن دیوانا وەزارەتێ و هەمی زانکۆ و سازیێن زانستی پشتی ئامادەکرنێ د پۆرتالێ خزمەت دا بکەڤیتە کاری بۆ خزمەتکرنا وەلاتیان.