سه‌رۆكێ‌ زانكۆیا دهۆك روینشتنه‌كا ڤه‌كری دگه‌ل 200 مامۆستایێن زانكۆیێ‌ ئه‌نجامدا
Oct. 7, 2021, 11:51 a.m.


سه‌رۆكێ‌ زانكۆیا دهۆك، د. داود سلیمان ئه‌تروشی، ل رۆژا 5/10/2021 دگه‌ل سه‌رۆكێن پشكێن زانستی و دۆرێن 200 مامۆستایێن زانكۆیێ‌ روینشتنه‌كا ڤه‌كری ل هۆلا كۆنفرانسان ئه‌نجام دا، كو بۆ ئێكه‌مین جاره‌ روینشتنه‌كا ب ڤی ره‌نگی به‌رفه‌ره دهێته‌ سازكرن بۆ لێك تێگه‌هشتنێ‌ د ناڤبه‌را مامۆستایان و هایداربوون ژ بۆچوونێن وان و ئاگه‌هداربوونا وان ژ بریارێن جڤاتا زانكۆیێ‌.

د. داود سلیمان ئه‌تروشی ل ده‌ستپێكێ‌ دیتنا خۆ بۆ پێشخستنا زانكۆیێ‌ بۆ مامۆستایێن ئاماده‌بووی دیاركر، ئه‌و ژی جه‌خت كرنه‌ ل سه‌ر كوالیتیا خاندنێ‌، هه‌روه‌سا ئه‌نجامدانا ڤه‌كۆلینێن زانستی دڤێت چاره‌سه‌ریا ئاریشێن وه‌لاتێ‌ خۆ بكه‌ن، دیسا خزمه‌تكرنا راسته‌وخۆ یا جڤاكی، و زانكۆ خۆ ل ئاریشێن جڤاكی بكه‌ته‌ خودان.

دڤێ‌ روینشتنا ڤه‌كری دا ده‌رگه‌هێ‌ دانوستاندنا راسته‌وخۆ هاته‌ ڤه‌كرن و مامۆستایێن زانكۆیێ‌ پسیارێن خۆ ئاراسته‌ی سه‌رۆكێ‌ زانكۆیێ‌ و هاریكارێن سه‌رۆكی كرن، د به‌رسڤا پسیاران دا سه‌رۆكێ‌ زانكۆیێ‌ گۆت "زانكۆیا دهۆك پێدڤیه‌ به‌رنامه‌ و پلانا خۆ یا پێشخستنێ‌ هه‌بیت، و ب رۆلێ‌ خۆ یێ‌ راسته‌قینه‌ راببیت و ستراتیژی و نێرینا خۆ هه‌بیت، و ئه‌ڤ پلانا زانكۆیێ‌ پارچه‌كه‌ ژ پلانا چاكسازیێ‌ یا حكومه‌تا هه‌رێمێ‌ دا زانكۆ بزڤریته‌ سه‌ر رێره‌وێ‌ خۆ یێ‌ دروست.

ل دۆر بابه‌تێ‌ نه‌وه‌رگرتنا قوتابیان ئه‌ڤ ساله‌ ل ده‌واما ئێڤاری، د. داود ئه‌تروشی، دیاركر كو ل دویف بریارا جڤاتا زانكۆیێ‌ ئه‌و قوتابیێن د پلانێ‌ دابوون ل ئێڤاریان بهێنه‌ وه‌رگرتن هه‌می دێ‌ ل سپێده‌هیان هێنه‌ وه‌رگرتن.

بۆ بابه‌تێ‌ درێژكرنا ده‌وامێ‌ ژی سه‌رۆكێ‌ زانكۆیێ‌ دیاركر كو ده‌وام ژ ده‌مژمێر 08:30 سپێدێ‌ دێ‌ ده‌سپێكه‌ت و هه‌تا 05:30 ئێڤاری دڤێت ده‌رگه‌هێن زانكۆیێ‌ نه‌هێنه‌ گرتن، و هه‌ر مامۆستا و قوتابی ده‌واما وی ل كیژ ده‌مژمێرێ‌ یه‌ ل وی ده‌می دێ‌ ده‌واما خۆ كه‌ت، كه‌واته‌ بۆ وان ده‌مژمێر نه‌هاتینه‌ زێده‌كرن، بتنێ‌ یا هاتیه‌ رێكخستن، بۆ هاتن و چوونا قوتابیان ژی ئاشكرا كر كو دوو پرۆژه‌ یێن هه‌ین، ئێك یێ‌ بله‌زه‌ و یێ‌ دووێ‌ یێ‌ درێژ خایه‌نه‌ بۆ چاره‌سه‌ركرنا هاتن و چوونا قوتابیان بۆ زانكۆیێ‌ كو كارتێكرن ل ده‌واما وان نه‌بیت ژ به‌ر هاتن و چوونێ‌.