دوو داهێنەرێن زانكۆیا دهۆك هاتنە خلاتكرن
Jan. 18, 2022, 4:59 p.m.

ئەڤرۆ 18/1/2022 و ل هۆلا خانی ل سەرۆكاتیا زانكۆیا دهۆك، و ب ئامادەبوونا هژمارەكا دەزگەهێن میدیایی، سەرۆكێ‌ زانكۆیا دهۆك، د. داوود سلێمان ئەترووشی، هەردوو داهێنەرێن كورد یێن زانكۆیا دهۆك مامۆستا، چیایی محمد حجی ژ كولیژا پەروەردا بنیات و قوتابی، ئەلند ئەمیر تەها، ژ كولیژا زانست خلاتكرن، كو باوەرنامەیێن داهێنانێ‌ ژ حكوومەتێن ئێراق، هند و ئوسترالیا وەرگرتینە.
د.داوود سلێمان ئەترووشی، د رێورەسمێن خلاتكرنێ‌ دا گۆت: "ئەڤرۆكە رۆژەكا تایبەتە، چونكی ئەم دێ‌ دوو كەسانێن خودان هزر و داهێنان ژ زانكۆیێ‌ خەلاتكەین پیرۆزباهیێ‌ لێكەین، یا تایبەتتر ژی ئەوە كو ئێك ژ ڤان داهێنەران قوتابیە ل زانكۆیا دهۆك، ئەڤە وێ‌ رادگەهینیت كو مە كەسانێن داهێنەر و خودان شیان هەنە كو بەری خواندنا زانكۆیێ‌ ب دویماهی بینن، باوەرنامێن داهێنانێ‌ بدەستڤەدئینن، یا گرنگە زانكۆ ژ هەمی لایەنان ڤە پشتەڤانیێ‌ لێبكەت و گرنگیێ‌ پێبدەت".
هەروەسا سەرۆكێ‌ زانكۆیا دهۆك دیاركر ئێك ژ كارێن سەرەكی یێن زانكۆیێ‌؛ دروستكرن و گەهاندنا زانین و تەكنۆلۆژیایێیە بۆ قوتابی و جڤاكی و پێدڤیە ئەڤ جۆرە چالاكیە بەردەوام بن، هەروەسا سەركەڤتن و بەردەوامبوون د پرۆژێن داهاتی دا بۆ زانكۆیێ‌ و كوردستانێ‌ بۆ وان خواست.
قوتابی، ئەلند ئەمیر تەها، لدۆر داهینانا خۆ دیاركر كو پاتریەك دروستكریە و ب ئاڤێ‌ و هندەك كەرستێن كیمیایی كاردكەت و بۆ ماوەیێ‌ پێنجی دەمژمێرا كارەبێ‌ بەرهەمدئینیت و شیانێن دووبارە چارجكرنێ‌ بۆ چەند جاران هەیە.
ژ لایێ‌ خۆ ڤە داهێنەر، چیایی محمد حجی، مامۆستایێ‌ زانستێن كومپیۆتەری ل كولیژا پەروەردا بنیات، دیاركر كو داهینانا وی یا ئێكێ‌ سیستەمێ‌ رزگاركرنا وان زارۆكایە، ئەوێن دكەڤنە دناڤ بیرێن تەنگ دا، دڤی سیستەمی دا دێ‌ زانن كا ئەو بیرە چەندا كویرە و چەوا ب زویترین دەم و بەری مەترسی بكەڤنە سەر ژیانا وی بیننەدەر، كو حكوومەتا هندێ‌ باوەرنامە ب ڤێ‌ داهێنانێ‌ دایە. داهێنانا دووێ‌ ژی، سیستەمێ‌ پاراستنا شوفێر روینشتڤانێن ترومبێلێیە ل دەمێ‌ هاژوتنێ‌ و تۆماركرنا رویدان و سەرپێچیێن شۆفیر و رێگرتن ل هاژۆتنا ترومبێلێ‌ ل دەمێ‌ كێمخەوی و مەستیێ‌، كو ژبەر ڤی سیستەمی، حكوومەتا ئوسترالی باوەرناما داهێنانێ‌ پێشكێشی مامۆستای كریە.
ل دویماهیێ‌ و پشتی ئەڤ داهێنانە ژ لایێ‌ هەردوو داهێنەرێن زانكۆیا دهۆك هاتینە شرۆڤەكرن، سەرۆكێ‌ زانكۆیا دهۆك بۆ دەربرینا دەستخۆشی و پیرۆزباهیان، خەلات پێشكێشی هەردوو داهێنەران كرن.