زانكۆیا دهۆك ب نوونەراتیا وەزارەتا خواندنا بلند و ڤەكۆلینێن زانستی یا حكومەتا هەرێما كوردستانێ ب هەڤكاری دگەل هەردوو زانكۆیێن (كوفە یا عیراقی و لیستەر یا بریتانی) كۆنفرانسێ نێڤدەولەتی یێ ئێكێ یێ فێركرنا پزیشكی ل رۆژێن 6و7/10/2018 ل ژێر درووشمێ (ب هێزكرنا فێركرنا پزیشكی ژ بۆ كۆالیتیا چاڤدێریا ساخلەمی) ل هۆلا كۆنفرانسان ل زانكۆیا دهۆك گێرا.
د رێورەسمێن كۆنفرانسی دا سەرۆكێ زانكۆیا دهۆك پ. د. مصلح دهۆكی د پەیڤەكی دا گۆت گێرانا ڤی كۆنفرانسی ل زانكۆیا دهۆك نیشانا پێشڤەچوون و پێشكەفتنا زانكۆیا دهۆكە، كو بەردەوام كارێ هەڤپشك ل گەل زانكۆ و ناڤەندێن ئەكادیمی یێن نێڤدەولەتی ئەنجام ددەت، دیار ژی كر كو زانكۆیا دهۆك هەردەم گرنگی دایە لایەنێ ساخلەمی چ ب رێكا گێرانا كۆر و كۆنفرانسێن زانستی و ئەكادیمی یان ژی گێرانا چالاكیێن مەیدانی ل ناڤا جڤاكی.
پ. د. مصلح دهۆكی هەروەسا ئاشكرا كر كو مەرەم ژ گێرانا ڤان چالاكیان گەهاندن و بهێز كرنا خزمەتێن ساخلەمی یە كو دڤێت زانكۆ ب ڤی ئەركی راببن، ئاماژە دا وێ چەندێ ژی كو ئەنجامدانا ڤی كۆنفرانسی د دەمەكی دایە كو قوتابیان ل زانكۆیا دهۆك دەست ب دەواما سالا نوی یا خواندنێ كریە، هیڤیی خواست كا چاوا ل دەستپێكا سالا خاندنێ ب كۆنفرانسێن نێڤدەولەتی دەست پێ كریە، هەروەسا ئەڤ سالا خاندنێ یا پری دەستكەفتێن زانستی بیت بۆ زانكۆیا دهۆك و رێبازا زانست و زانین و گەهاندنا خزمەتێ بیت بۆ جڤاكی بگشتی و ڤێ دەڤەرێ بتایبەتی.
د. نەجدەت ئاكرەی نوونەرێ وەزیرێ خواندنا بلند و ڤەكۆلینێن زانستی د پەیڤەكی دا دیاركر كو وەزارەتا خواندنا بلند هەردەم گرنگیێ ددەتە كوالیتیا خواندنێ و پێشخستنا وێ و گێرانا ڤی كۆنفرانسی ژی پشكەكە ژ ڤێ گرنگیێ، راگرێ كۆلیژا پزیشكی د. قاسم حەسو ژی د پەیڤەكی دا ئاماژە دا كارێن كۆنفرانسی و دیاركر كو بۆ دوو رۆژان دێ یێ بەردەوام بیت و بابەتێن گرێدای فێركرنا پزیشكی دێ تێدا هێنە گەنگەشە كرن.
د كۆنفرانسی دا هژمارەكا بسپۆر و شارەزایێن بوارێ ساخلەمیێ ژ چەندین وەلاتان پشكداری ببوون و چەندین ڤەكۆلین ل دور فێربوونا پزیشكی و چاڤدێریا ساخلەمی پێشكێش كرن.