ب هەلكەفتا 70 سالیا راگەهاندنا جیهانیا مافی مرۆڤی یا ژلایێ كومەلا گشتی یا نەتەوەیێن ئێكگرتی ل پاریس ل رێكەفتی 10 دیسمبەرا 1948ێ ب بریارا ژمارا 217 و 27 بەندا پێكهاتبوو، ل رۆژا 9/12/2018 ب بەرهەڤبوونا سەرۆكێ زانكۆیا دهۆك و چەند مامۆستایێن زانكۆیێ و رەوشەنبیر و زانایێن ئاینی رۆژا جیهانییا مافی مرۆڤ ل زانكۆیا دهۆك هاتە ساخكرن.
سەرۆكێ زانكۆیا دهۆك (پ.د. مصلح دهۆكی) ژلایێ رێكخراوا جیهانیا مافی مرۆڤ ڤە هاتە خەلاتكرن، ژبەر دماوەیێ بوریدا سەرۆكێ زانكۆیا دهۆك پێشتەڤانیا ل قۆتابیێن ئاوارە كریە و نەهێلایە كاروانێ خواندنا قوتابیان براوستیت.
خالد مەحموود، سەرۆكێ رێكخراوا مافێن مرۆڤ یێن نیڤدەولەتی گۆت:" ل رۆژا جیهانیا مافی مروڤدا ژنەكا ئیزیدی ژ دەستێ تیرۆرستێن داعشێ رزگار بوویی هاتە خەلاتكرن ژلایێ رێكخراوا مافی مرۆڤ ڤە و چەندین بەندێن مافێن مرۆڤ و دیرۆكا وێ هاتنە بەحسكرن".
سەرۆكێ رێكخراوا مافێن مرۆڤ یێن نیڤدەولەتی خویاكر:" لەیلا تەعلو ئەو ژنا كوردا ئیزیدی ب هەمی وێرەكی ڤە شیایی ژ دەستێ تیرۆرستێن داعشێ ڤە رزگار بیت بوویە سەفیرا ئاشتیێ ل رێكخراوا جیهانیا مافی مرۆڤ و هەروەسا باجا ئەندامەتیێ پێهاتیەدان، داكو ببیتە بەرەڤانەك ژ مافێن مرۆڤی و سەركەفتنا زولم لیكریا لسەر رویێ ئەردی".
لەیلا تەعلو ئاخفت:" مافی مرۆڤ ل سەر ئاستێ جیهانێ نینە، بتنێ مافی مرۆڤ دروشمەكە دئێتە بكار ئینان بۆ هندەك مەرەمان، سەرارایی هندێ ژ دل سۆپاسیا خەلكێ هەرێما كوردستانێ و ب تایبەت خەلكێ پارێزگەها دهۆكێ دكەم كۆ وان ب هەمی رەنگان هاریكاریا مە كریە هەر ژ دەمێ ئاوارە بوونێ تا نوكە و بتنێ ڤی خەلكی مافێ مرۆڤی پاراستیە".
راگەهاندنا زانكۆیا دهۆك: هەلز عەلی سەلیم