شاندەكێ كۆلیژا زانستێن ساخلەمی ژ زانكۆیا ئەمریكی ل بەیروتێ ب سەرۆكاتیا د. ئیمان موئەیەد راگرێ كۆلیژێ و د. قاسم كەسەك ل رۆژا 12/1/2016 سەرەدانا زانكۆیا دهۆك كر، و ژلایێ سەرۆكێ زانكۆیا دهۆك پرۆفیسۆر د. مصلح دهۆكی پێشوازی لێ هاتە كرن.
د كۆمبوونەكی دا ب ئامادەبوونا راگرێن هەر پێنج كۆلیژێن پزیشكی یێن زانكۆیا دهۆك بەحسێ پەیوەندیێن هەڤپشك د ناڤبەرا هەردوولا دا و چاوانیا مفا وەرگرتن ژ ڤان پەیوەندیان وەكو پێكگوهارتنا مامۆستا و قوتابیان بۆ راهێنانێ ل وێ زانكۆیێ هاتە كرن.
د. ئیسماعیل محەمەد راگرێ كۆلیژا زانستێن ساخلەمی گۆت"مە داخواز ژ شاندێ ناڤبری كر كو كۆلیژا مە ببیتە جێمك دگەل كۆلیژا زانستێن ساخلەمی زانكۆیا ئەمریكی ل بەیروتێ چونكو زانكۆیەكا كەڤنارە كو ل سالا 1866 هاتیە دامەزراندن و ئاستێ وێ یێ زانستی یێ بلندە، دێ گەلەك مفای ژێ وەرگرین ب تایبەت د بوارێن وەرگرتنا قوتابیێن خواندنا بلند و پێكگوهارتنا مامۆستایان و رێكێ ب دەنە قوتابیێن مە بچنە كۆلێژا وان بۆ راهێنانێ چونكو وان نەخۆشخانەكا فێركرنێ یا پێشكەفتی یا هەی".
د. ئیمان موئەیەد راگرێ كۆلیژا زانستێن ساخلەمی ژ زانكۆیا ئەمریكی ل بەیروتێ گۆت"مەرەم ژ سەرەدانا مە ئەوە ئەم زانكۆیا دهۆك ژ نێزیك ببینین ب تایبەت كۆلیژێن بزیشكی داكو بشێین د ئاینەدەی دا ڤەكۆلینێن زانستی یێن هەڤپشك و پێكگوهارتنا مامۆستایان بكەین".