قۆنسلێ گشتیێ رۆسیا سەرەدانا زانكۆیا دھۆك دکەت
June 14, 2023, 9:39 a.m.

قۆنسلێ گشتی یێ رۆسیا ل ھەولێرێ مەكسیم رۆبێن ئەڤرۆ رێكەڤتی ١٦ـی گولانێ ٢٠٢٣ سەرەدانا زانكۆیا دھۆك كر و ژلایێ د. داود سلێمان ئەتروشی سەرۆكێ زانكۆیا دھۆك ڤە پێشوازی لێ ھاتەكرن. ئارمانجا ڤێ سەرەدانێ بھێزكرنا پەیوەندیان دناڤبەرا زانكۆیا دھۆك و ناڤەندێن ئەكادیمی ل روسیا فیدرال، ھەروەسا گەنگەشەكرنا گرنگیا ھەڤكاریێ دناڤبەرا ھەرێما كوردستانێ و روسیا فیدرال دا د بوارێ فێركرن و گەشەپێدانێ دا بوو.

ل دەستپێكا ھەڤدیتنێ د. داود ئەتروشی باس ل دیرۆكا زانكۆیا دھۆك كر و ل دویڤ دا پەیكەرێ زانكۆیێ و بوارێن خواندنێ شرۆڤەكرن، دیسان سەرۆكێ زانكۆیێ گوت "زانكۆیا دھۆك ئێكە ژ باشترین زانكۆیێن عیراقێ كو خۆدان پەیوەندیێن ناڤدەولەتی یێن بەرفرەھە، لێ ب مخابینی ڤە ھەتا نوكە مە پەیوەندیێن فەرمی ل گەل چ زانكۆیێن رۆسیا بۆ ھەڤكاری و پشكداریكرنێ نینن. ئەم ھیڤی خوازین سەرەدانا وە ببیتە پرەك بۆ پەرەپێدانا ھەڤكاریێ دناڤبەرا مە و زانكۆیێن رۆسی دا".

ژلایێ خۆڤە قۆنسلێ گشتی یێ رۆسیا فیدرال گۆت "دێ ھەولا پێكئینانا پەیوەندیێن باش دناڤبەرا زانكۆیا دھۆك و زانكۆیا فیدرال یا باشوری یا رۆسیا د پاشەرۆژێ دا كەین، دێ ھەڤكاری د ناڤبەرا زانكۆیێن رۆسیا و زانكۆیێن ھەرێما كوردستانێ دا ھەبیت، ب رێكا رێكخستنا سەرەدانا بۆ زانكۆیێن رۆسیا بۆ كوردستانێ بۆ لێكگوھۆرینا ھزرا و گەنگەشەكرنا ھەڤكاریێ د پاشەرۆژێدا". ھەروەسا دیاركر كو حكومەتا رۆسیا ٦٠ كورسیێن خواندنا بلند بۆ قوتابیێن ھەرێما كوردستانێ د بوارێن جودا دا تەرخانكرینە و ئەڤە باشترین دەلیڤەیە داكو قوتابی سەرەدانا رۆسیا بكەن و پتر ل سەر كەلتۆر و دیرۆكا رۆسیا بزانن و فێری زمانێ رۆسی ببن. دیسان بالیۆزێ رۆسیا ب كورتی باس ل سیستەمێ فێركرنێ و كاریگەریا شەری ئوكرانیا ل سەر كەرتێ فێركرنێ ل ولاتی خۆ كر.

ل دویماھیێ د. داود ئەتروشی پێشنیازا ڤەكرنا كوژیەكێ رۆسی ل زانكۆیا دھۆك پێشكێشی بالیۆزێ رۆسیا مەكسیم رۆبێن كر، بۆ خزمەتكرنا جڤاكی ب شێوەكێ باشتر و ڤەگۆھاستنا زانین و شارەزایی و دیرۆك و نەریتێن رۆسیا، ئەوژی ب رێكا پێشكێشكرنا سیمناران و ڤەكرنا خۆلێن فێربوونا زمانێ رۆسی. ھەروەسا داكو ھەڤپشكی ل گەل زانكۆیێن رۆسیا د بوارێن جودا بھێنە پێكئینان بۆ پەرەپێدانا پەیوەندیێن ئەكادیمی ل گەل رۆسیا. پشتی ھینگێ د. داود ئەتروشی دیاریەكا رێزلێنانێ پێشكێشی بالیۆزێ گشتی یێ رۆسیا ل ھەولێرێ كر.

راگەھاندنا زانكۆیا دھۆك؛ ١٦ـی گولان ٢٠٢٣

راپۆرت: فرمێسك حەسۆ

وەرگێران: ماھر كێستەیی

فۆتۆ: محەمەد عەبدولكەریم و عەلی بانكی