کولیژا پەروەردا زانستێن وەرزشی ل زانکۆیا دهۆک رێککەڤتنەک دگەل زانکۆیا ڤاسل لیڤسکی یا بولگاری ئیمزاکر
July 22, 2022, 12:28 a.m.

بۆ پتر هەماهەنگیێ و مفاوەرگرتن ژ پێشڤەچوونێن ئەکادیمی د بوارێ وەرزشی دا و فراوانکرنا تۆرا پەیوەندیێن کولیژێن جودایێن زانکۆیا دهۆک، و د چارچۆڤێ سەرەدانەکێ دا بۆ وەلاتێ بولگاریا، راگرێ کولیژا پەروەردا جەستەیی و زانستێن وەرزشی د کۆمبوونەکێ دا، رێککەڤتنەکا هەڤکاری و هەماهەنگیێ دگەل د. نیکۆلای ئیزۆڤ، سەرۆکێ زانکۆیا ڤاسل لیڤسکی NSA ئیمزاکر. د ڤێ کۆمبوونێ دا فەرسەت حەسەن، رێڤەبەرێ پەیوەندیێن گشتی ل لژنا ئۆلۆمپیا دهۆکێ و سلێمان حەسەن، راهێنەرێ یانا دهۆک یا تەپا پێی، دگەل میخائێل کراستیڤ، ئەندامێ جڤاتا ئەمیندارێن ئەکادیمیا نیشتیمانیا زانستان ل بولگاریا ئامادەبوون.

د رێککەڤتنێ دا، هەردوو لایەن رازی بوون لسەر هەماهەنگی و هەڤکاریێ د گەلەک بواران دا، وەکو: پێکگوهارنا ئەکادیمی، مەشقدان، پێشڤەبرنا پرۆگراما و هەڤکاری د بوارێ ئەنجامدانا ڤەکۆلینێن زانستی دا. لدویڤ ڤێ رێککەڤتنێ، مامۆستا و ڤەکۆلەر دێ هێنە پێکگوهارتن ب مەرەما شێورمەندیا هەڤپشک و فێربوون و مەشقدانا پراکتیکی. هەروەسا ئەڤ پێکگوهارتنە قوتابیان ژی بخۆڤە دگریت.

لدۆر ڤێ رێککەڤتنێ، د. نیکۆلای ئیزۆڤ، سەرۆکێ زانکۆیا ڤاسل لیڤسکی راگەهاند "ئەز گەشبینم ب ناڤەرۆکا ڤێ رێککەڤتنێ و ئەڤە پێنگاڤا ئێکێ یە و من باوەری هەیە ئەڤ پەیوەندیە دگەل زانکۆیا دهۆک دێ پتر پێشڤەچن و ئەم هەردوو لایەن دێ مفاداربین".

ژ لایێ خۆ ڤە د. ئەحمەد محەمەد قاسم سوپاسیا داخوازنامە و پێشوازیا زانکۆیا ڤاسل لیڤسکی کر و هیڤی خواست کو ئەڤ هەڤکاریە بەردەوام فراوانتر لێبهێت و هەماهەنگی و کارێ هەڤپشک د ناڤبەرا ناڤەندێن ئەکادیمی و زانستی دا ب گرنگ سالۆخدا.