سەرۆكێ‌ زانكۆیا دهۆك: پێدڤیە زانكۆیا دهۆك یا پێشەنگ بیت د بیاڤێن پەروەردێ‌ و چاندنێ‌ دا
نوفمبر 23, 2021, 11:43 م

سەرۆكێ‌ زانكۆیا دهۆك، د. داود سلیمان ئەتروشی دیاركر كو كۆلیژێن پەروەردێ‌ و چاندنێ‌ دێ‌ گرنگیەكا پتر دەینێ‌، چونكو كۆلیژێن پەروەردێ‌ پێدڤیە مامۆستایەكێ‌ خودان شیان دەربێخیت، ئەو مامۆستا بخۆ راهێنەر بن ل جهێ‌ كارێ‌ خۆ بۆ مامۆستایێن دیتر، هەروەسا چاندنێ‌ ژی هەتا نوكە ئەو گرنگیا پێدڤی پێ‌ نەهاتیە دان، سەرەرایی كو دەڤەرا مە یا چاندنێ‌ یە، و پێدڤیە زانكۆیا دهۆك دڤان هەردوو بیاڤان دا پێشەنگ بیت.

ئەڤ داخۆیانیا سەرۆكێ‌ زانكۆیێ‌ ل رۆژا 23/11/2021 د كۆمبوونەكی دگەل جڤاتا كۆلیژا زانستێن مرۆڤایەتی هات، كو ب یاوەریا د. ئەحمەد محەمەد سالح، هاریكارێ‌ سەرۆكێ‌ زانكۆیێ‌ بۆ كاروبارێن كارگێری و دارایی سەرەدانا وێ‌ كۆلیژێ‌ كری داكو ژ نێزیك هایداری رەوشا كۆلیژێ‌ ببن.

سەرۆكێ‌ زانكۆیێ‌، هەروەسا بەحسێ‌ مەرەما ڤان سەرەدانان كر بۆ كۆلیژێن زانكۆیێ‌، و گۆت "مەرەم ژ ڤان سەرەدانان ئەوە ئەم نێرین و بۆچوونێن خۆ بگەهینین، و هەروەسا گوهداریا بۆچوونێن جڤاتێن كۆلیژان ژی بكەین" و ئاماژە دا وێ‌ چەندێ‌ ژی كو دەمێ‌ بەحسێ‌ زانكۆیێ‌ دكەین مەرەم ژێ‌ ئەو نینە كو زانكۆیا دهۆك چ كار نەكریە، بەلێ‌ كارێ‌ پتر ژێ‌ دهێتە چاڤەرێ‌ كرن، و پێشبینیێن مە ژ ڤی كاری پتر، زانكۆ دشێت كارێ‌ باشتر بكەت.

ل دۆر پلان و بەرنامێ‌ زانكۆیێ‌، د. داود ئەتروشی، بۆ جڤاتا كۆلیژا زانستێن مرۆڤایەتی دیاركر كو چەند لژنێن كاری د بیاڤێن جودا دا هاتینە پێكئینان، بۆ نموونە لژنەك بۆ زێدەكرنا وەبەرهێنانێ‌ ل زانكۆیێ‌، ئێك ژی بۆ پتر رێكخستنا هاتن و چوونا قوتابیان و دانانا هێلا زانكۆیێ‌ یا ڤەگوهاستنێ‌، لژنەك بۆ رێكخستنا كۆنفرانسێن زانستی یێن زانكۆیێ‌ كو پێدڤیە ل دویف دووماهی پێشكەفتنان بن ل جیهانێ‌، گۆت ژی ل زانكۆیا دهۆك ئەم پێدڤی ب گوهوریناینە، گوهورین بۆ بەرەف پێش بهێنە كرن، بۆچوون بهێنە وەرگرتن كا چ بهێتە كرن، ئاشكرا ژی كر كو یا فەرە سەنتەرەك ل زانكۆیا دهۆك هەبیت كەسێن خودان شیان لێ‌ كار بكەن بۆ راهێنان و پێشخستنێ‌، چونكو مامۆستایێ‌ زانكۆیێ‌ چەند باوەرنامەكا بلندتر بدەستخۆڤە بینیت پتر پێدڤی ب خۆپێشخستنێ‌ یە.

سەرۆكێ‌ زانكۆیا دهۆك، ئەو ژی راگەهاند كو دوو پۆرتال هاتینە چێكرن، ئێك بۆ گەهاندنا بیروبۆچوون و گازندە و پێشنیارانە، بۆ سەرۆك و جڤاتا زانكۆیێ‌، پۆرتالێ‌ دووێ‌ ژی بۆ پێشكێش كرنا راستەوخۆیە بۆ پۆستێن ئیداری و دا زانكۆیێ بەنكەكا داتا و پێزانینان ل دورمامۆستایان هەبیت بو جهێن پێدڤی ، دیارژی كر كو چ مەرج نەهاتینە دانان بۆ ئەوێ‌ پێشكێش دكەت، یان جهێ‌ پێشكێش دكەت تێدا نەهاتیە دەستنیشان كرن، ژبۆ وێ‌ چەندێ‌ ئەو كەسێ‌ پێشكێش دكەت بزانیت دێ‌ بكێری كیژ جهی هێت پێشكێشی وی جهی بكەت.

هەر دڤێ‌ كۆمبوونێ‌ دا راگرێ‌ كۆلیژا زانستێن مرۆڤایەتی و ئەندامێن جڤاتا كۆلیژێ‌، بۆچوون و پێدڤیێن كۆلیژێ‌ و پشكێن زانستی گەهاندنە سەرۆكێ‌ زانكۆیێ‌، و هاریكارێ‌ سەرۆكی، و بریار هاتە دان بۆ پێدڤیێن كۆلیژێ‌ ئەو كارێن پتر پێدڤی پێ‌ هەبیت بهێنە بجهئینان داكو ب رەنگەكێ‌ باشتر كار برێڤە بچیت.