ل رێكەفتی 16/6/2021 ل كلینیكا ئای پی پی یا ئەلمانی بو چارەسەریا دەرونی و ئامادەبونا چار ماموستایێن زانكویا توبنگن وشتوتگا یا ئەلمانی، رونشتنەك هاتە رێكخستن ژبو دانەنیاسینا كلینیكا ناڤبری بو كومەكا نوژدار ورێكخراوێن بیانی ئەوێن ل پارێزگەها دهۆكێ كاردكەن.
دكتور مەمو فەرحان جێگرێ راگرێ پەیمانگەها چارەسەریا دەرونی وچارەساریا ترومایێ گوت" ئەڤ ماموستایێن ئەلمان ژبەر بەرلاڤبونا كرونایێ نەشیان بو ماوەیەكی درێژە سەرەدانا مە بكەن دنوكە دگەل مە ئامادەبوون بو سەرپەرشتی كرنا نامێن ماستەرێ یێن پەیمانگەها مە، مە دەرفەت زانی كو ڤێ رونشتنێ ئەنجام بدەین ل كلینیكا ئای پی پی ژبو دیتن ونیشاندانا كارێ كلینیكێ بو شاندێ ئەلمان وئەو رێكخراوێن بیانی ئەوێ ل پارێزگەها دهۆكێ كاردكەن ژبو هندێ ئەگەر لایەكی هزرەكا نی هەبیت یان پرۆژەكێ نوی هەبیت یان تێبینیەك ل سەر كارێ مە هبیت، ئەڤەژی بو جهێ خوشحالیا شاندێ ئەلمان چونكو ئەڤ كلینیكە ژلایێ وانڤە ل زانكۆیا دهۆكێ هاتیە ڤەكرن.
دكتور مەمو ئەوژی گوت"مە گەلەك پێخوشە هەر رێكخراوەكا بیانی بیت بهێن دگەل مە كار بكەن مە دڤێت پتر ڤێ كلینیكێ پێش بێخین، چونكو دپاشەروژێ دا مە ل بەرە ئەم ڤێ كلینیكێ بەرفرەهتر لێ بكەین وەكو نەخوشخانە وسەنتەركێ مەزن یێ دەروونی كو ستافەكێ بەرفرەهێ دەرونی لێ ئامادەبن چونكو دەرچوویێن پەیمانگەها مە سال بو سالێ دێ پتر بن و دێ شێن كارەكێ باش ل ڤی بیاڤی دا ئەنجام دەن.
كلینیكا ئای پی پی یا ئەلمانی بو چارەسەریا دەروونی ل مەها دوو یا ئەڤ سالە هاتیە ڤەكرن ل ئاڤاهیێ كولیژا زانستێن تەندروستی، دەرچوویێن پەیمانگەها چارەسەریا دەروونی وچارەسەریا تروامایێ ل ڤێ كلینیكی چارەسەریا نەخوشان دكەن بێ بەرامبەر.