5ـی ئوکتۆبەرا 2022ـێ

ل ژێر ناڤونیشانێن بجهئینانا پێڤاژۆیا بۆلۆنیا BOLOGNA PROCESS IMPLEMENTATION ئەڤرۆ ل کولیژا زانست ل زانکۆیا دهۆک، و ب ئامادەبوونا د. داود سلێمان ئەتروشی سەرۆکێ زانکۆیا دهۆک، و د. لوقمان هادی حەسەن هاریکارێ سەرۆکێ زانکۆیێ بۆ کاروبارێن زانستێ، و د. محەمەد عەزیز راگرێ کولیژا زانست و هژمارەکا سەرۆک پشک و مامۆستایان، وۆرکشۆپەک، کو دێ بۆ ماوێ دوو رۆژان یا بەردەوام بیت، هاتە ئەنجامدان.

د دەسپتێکا وۆرکشۆپێ دا، د. محەمەد عزیز پەیڤەک پێشکێشکر و بخێرهاتنا سەرۆکێ زانکۆیێ و شاندێ دگەل دا کر بۆ پشتەڤانیا بەردەواما هەمی کار و چالاکیێن کولیژێ، ب تایبەت جێبەجێکرنا پێڤاژۆیا بۆلۆنیا ل زانکۆیا دهۆک.

پاشی د. داود سلێمان ئەتروشی سەرۆکێ زانکۆیا دهۆک، د گۆتارا خۆ دا ب کورتی باس ل گرنگیا پێڤاژۆیا بۆلۆنیا ل زانکۆیا دهۆک کر، هەر د درێژیا گۆتارا خۆ دا سەرۆکێ زانکۆیێ گۆت "پێدڤیە گرنگیەکا مەزن ب قوتابیێن قووناغا ئێکێ بهێتەدان و باشترین مامۆستا بۆ بهێنە ئامادەکرن، ژبەرکو قووناغا ئێکێ بنیاتێ قوتابیە ل زانکۆیێ". هەر دیسان سەرۆکێ زانکۆیێ داخواز ژ سەرۆک پشک و مامۆستایان کر، گرنگیەکا زێدەتر ب مۆدلی و نڤیسینا راپۆرتا ژلایێ قوتابیان ڤە بدەن.

ژ لایەکێ دی ڤە د. ئسماعیل ئەمین عەلی بەرپرسێ یەکا پێڤاژۆیا بۆلۆنیال زانکۆیا دهۆک، باس ل مێژوویا پەیدابوونا بۆلۆنیا پرۆسێس و وان زانکۆ و وەلاتێن ئەڤێ پێڤاژۆیێ پەیرەودکەن کر، گەلەک ب هویری زانیاریێن گرنگ لدۆر پێڤاژۆیا بۆلۆنیا پێشکێشکرن.

پاشی، سمینارەک ژ لایێ د. محەمەد عەزیز راگرێ کولیژا زانست و د. ئەمین عەبدولقادر مامۆستایێ زانکۆیێ ڤە لدۆر بجهئینانا پێڤاژۆیا بۆلۆنیا هاتە پێشکێشکرن، تێدا گەلەک ب هویری باس ل خالێن سەرەکیێن سەرکەڤتنا پێڤاژۆیا بۆلۆنیا بۆ ئامادەبوویان هاتە کرن.

د. محەمەد عەزیز راگرێ کولیژا زانست، راگەهاند "ئارمانجا سەرەکی ژ ڤێ وۆرکشۆپێ، کو هاتیە رێکخستن ژلایێ یەکا پێڤاژۆیا بۆلۆنیا ل کولیژا زانست ڤە، بەرهەڤکرن و ئامادەکرنا مامۆستایانە بۆ هەمی قوناغێن خواندنێ ب تایبەتی قوتابیێن قووناغا ئێکێ ل هەمی بەشێن کولیژێ، کو ئەڤ چەندەژی دێ بیتە ئەگەر بەرهەم ئینانا دەرچوویێن بەرهەمئینەر کو ب باشترین شێوە خزمەتا وەلاتێ خۆ بکەن، ل دویماهیا ئەڤێ وۆرکشۆپێ ژی پێشنیار و رێنمایێ و خالێن نەدیار دێ بۆ مامۆستایان، ب تایبەتی یێن قووناغا ئێکێ هێنە رۆن و ئاشکراکرن.

دیسان، د. ئەمین عەبدولقادر دەربارەی ڤێ وۆرکشۆپێ خویاکر "ئاشکراکرنا پێگەهـ و خالێن سەرەکیێن پێڤاژۆیا بۆلۆنیا بۆ مامۆستایێن قووناغا ئێکێ بۆ خواندنا ئەڤ سالە گەلەک گرنگە، داکو مامۆستا باشترین شیان و کارامەیێ ل دەڤ قوتابی پەیدابکەت، دەما کو قوتابی زانکۆیێ تمام دکەت، بتنێ چاڤەرێی دامەزراندنا نەبیت ژلایێ حکومەتێ ڤە، بەلکو ئەو بۆ خۆ کارەکی پەیدابکەت و ب باشترین شێوە ئەنجام بدەت".