A workshop about how to build a strong KRG Government at UoD
Jan. 9, 2019, 7:13 p.m.

ل زانكۆیا دهۆك ووركشۆپەكا تایبەت ل دۆر ئەركێن كابینا نەهێ‌ یا حكومەتا هەرێما كوردستانێ‌ ب پشكداریا كەسانێن بسپۆر و شارەزا د بیاڤێن جودا دا ژ لایێ‌ لژنا ناوچا چرا یا پارتی دیموكراتی كوردستان ل سەرنتەرێ‌ رەوشەنبیری و جڤاكی یێ‌ زانكۆیا دهۆك ل رۆژا 8/1/2019 هاتە ئەنجامدان.
بەرپرسێ‌ لژنا ناوچا چرا بەیار سەفەر چیچو د داخۆیانیەكی دا بۆ مالپەرێ‌ زانكۆیا دهۆك راگەهاند كو نێزیكی سەد ئەكادیمیێن د بیاڤێن جودا دا یێن زانكۆیا دهۆك كۆمەكا تەوەرێن گرنگ ل دۆر ژین و ژیارا خەلكی ل تەوەرێن یاسایی و ئابووری و چاكسازی و خزمەتگوزاری و سیاسی هاتنە گەنگەشە كرن، گۆت ژی ئەم ل بەر دەرازینكا پێكئینانا حكومەتا داهاتی نە پارتی ل گورەی هەر سەردەمەكی بەرهەڤیێن هندێ‌ دكەت كا دێ‌ چەوا شێت ڤی مللەتی جوانتر ب رێڤە ببەت.
سەرۆكێ‌ زانكۆیا دهۆك پ. د. مصلح دهۆكی د پەیڤەكی دا ل رێورەسمێن ڤەكرنا ووركشۆپی گۆت كوردستانەكا بهێز كو درووشم و هیڤیا مە هەمیایە و مە دڤێت كوردستان یا بهێز بیت و هەردەم بهێز تر لێ‌ بهێت، چونكو چەند كوردستان یا بهێز بیت ئەو هند دێ‌ دشیان دابیت مافێن خەلكێ‌ وێ‌ بهێنە بدەستڤە ئینان، چەند كوردستان یا بهێز بیت ئەو هند دێ‌ دشیان دا بیت بەرەڤانی ژ ئاخ و سەروەریا وێ‌ بهێتە كرن.
پ. د. مصلح دهۆكی هەروەسا گۆت كوردستانەكا بهێز ئانكو خەلكێ‌ وێ‌ د ئارامی و سەقامگیریا سیاسی و ئابووری و ئێمناهیێ‌ دابیت و چ جاران هەست ب مەترسیان نەكەت بۆ سەر هەرێمێ‌ و چ جاران خۆ ب هاولاتیێ‌ پلە دوو یان هاولاتیێن كێمتر نەزانیت هەمبەری هاولاتیێن وەلاتێن دەوروبەر و هاولاتیێن پارچێن دیتر یێن عیراقا فیدرال، ئاماژە دا وێ‌ چەندێ‌ ژی كو راستە حكومەتا نوكە یا هەرێما كوردستانێ‌ روی ب روی گەلەك پێشهات و ئاستەنگ و هەڤركیا بوو، بگرە ژ ئەنجامدانا ریفراندوما سەرخوەبوونێ‌ و قەیرانێن دارایی و شەرێ‌ سەپاندی یێن تیرۆرستێن داعش و ناكوكیا دەڤەرێن كوردستانی یێن دەرڤەی ئیدارا هەرێما كوردستانێ‌ و د ڤان روی ب روی بوون و پێشهاتان دا بەلەنسا هەرێما كوردستانێ‌ پاراستیە و نەهێلایە چ تشتەك ببیتە بەهانە بۆ دەستێن دەرەكی كو مایتێكرنێ‌ د سەروەریا هەرێمێ‌ دا بكەن.
هەروەسا گۆت هەردەم ئەم دووپاتیێ‌ ل وێ‌ چەندێ‌ دكەین كو ئەگەر مە حكومەتەكا بهێز بڤێت، دڤێت ئەم هەمی چ وەكو سازیێن ئەكادیمی یان ژی وەكو وەلاتیێن هەرێمێ‌ پالپشت و پشتەڤان بین بۆ كارێن ڤێ‌ حكومەتێ‌ داكو بشێت ئەو بەرنامە و پلانێن ل بەر دەستێن وێ‌ بجه بینیت و كارێن خو ب دروستی ئەنجام بدەت.
ژلایەكێ‌ دی ڤە راگرێ‌ كۆلیژا یاسا و زانستێن رامیاری د. قاسم ئەحمەد بۆ مالپەرێ‌ زانكۆیێ‌ گۆت ئەگەر یاسا یـا سەروەر بیت دێ‌ كوردستان ژ هەمی لایەكی ڤە پێش كەڤیت.
د ڤی ووركشۆپی دا پێنج تەوەر هاتنە گەنگەشەكرن ئەو ژی (یاسایی، ئابووری، چاكسازی، خزمەتگوزاری و سیاسی) و ب ئامادەبوونا بسپۆرێن د ڤان بیاڤان دا دانوستاندن ل سەر هاتنە كرن.