ل زانكۆیا دھۆك وۆركشۆپەك ل دۆر زمانێ عەرەبی ھاتە ئەنجامدان
June 14, 2023, 9:40 a.m.

پشكا زمانێ عەرەبی ل كولیژا پەروەردا بنیات – زانكۆیا دھۆك ب ھەڤكاری ل گەل پشكێن زمانێ عەرەبی ل زانكۆیێن مووسل، زاخۆ، سۆران، تەكنیكی یا باكۆرێ عیراقێ و كولیژا نۆر یا زانكۆ، وۆركشۆپەك ب ناڤونیشانێ "زمانێ عەرەبی: كەتوار و ھیڤی – اللغة العربیة: الواقع والطموح" ل ٤ـی گولانێ ٢٠٢٣ ل ھۆلا سمینارا ل كۆلیژا پەروەردا بنیات ھاتە ئەنجامدان.

وۆرگشۆپ ژ چوار روینشتنا پێكدھات كو د ھەر روینشتنەكێ دا پێنج مامۆستایێن زانكۆیێن پشكدار سمینارێن خۆ ل دۆر بابەتێن جودایێن گرێدای زمانێ عەرەبی پێشكێشكرن. د. جوان محەمەد موفتی سەرۆكا پشكا زمانێ‌ عەرەبی ل كولیژا پەروەردا بنیات زانكۆیا دهۆك ئارمانجا ڤی وۆركشۆپی دیاركر كو پێشئێخستنا زمانێ عەرەبی یە ل دەف ئاخڤتنكەرێن رەسەن و قوتابیێن پشكێن زمانێ عەرەبی، دیسان باس ل گرنگیا وۆركشۆپی كر و گۆت "ژبەر گرنگیا زمانێ‌ عەرەبی و پێدڤیاتیا وی ب تایبەت ل پارێزگەها دهۆكێ‌، پشكا زمانێ‌ عەرەبی ل زانكۆیا دهۆك ب فەر دیت گرنگی ب پەیوەندیێن خۆ ل گەل پشكێن زمانێ‌ عەرەبی ل زانكۆیێن دی بدەت، ئەڤ وۆركشۆپە ب پشكداریا ١٠ پشكێن زمانێ‌ عەرەبی ژ شەش زانكۆیێن ھەرێما كوردستانێ و عیراقێ، ب مەرەما پێكڤەكاكرن و ھەماھەنگیێ ھاتیە ئەنجامدان، زێدەباری مفاگەھاندنێ ب جڤاكی ژ زمانێ عەرەبی".

دیسان د. جوان موفتی بەردەوامی ب ئاخڤتنا خۆ دا و دیارکر "مە داخواز كریە زمانێ‌ عەرەبی ل سەنتەرێ‌ زمانان ل زانكۆیا دهۆك بھێتە زێدەكرن، ژبەركو گرنگیا وی ژ زمانین دیتر كێمتر نینە و زمانێ عەرەبی زمانێ ژێدەرێن زانستیە د چەندین بوارێن گرنگ یێن زانستێن مرۆڤایەتی دا، لەورا نابیت زانین و فێربوونا زمانێ عەرەبی ب تنێ گرێدای قوتابیێن پشكێن زمانێ عەرەبی بیت، بەلكو پێدڤیە ل ھەمی كولیژان گرنگی ب زانین و فێربوونا وی بھێتە دان.

ل دویماھیێ ژی وۆركشۆپی هندەک راسپاردە و پێشنیاز پێشكێشكرن، ژ وان ژی: دانانا رێبازەكا گشتگیر و ئێكگرتی بۆ كۆلیژێن پەرەوەرێ بۆ فێركرنا زمانێ عەرەبی، گەشەپێدانا رەھوانی و شیانان ل دەف قوتابیان، دیزاینكرن و ئەنجامدانا چالاكیێن جودا بۆ ئاسانکرنا گەھاندنێ و بدەستڤەئینانا زمانی، پێشئێخستنا پەرتۆكخانێن زانكۆیا د خزمەتا فێركرنا زمانێ عەرەبی دا و بەرھەڤكرنا فەرھەنگێن نڤیسکی و زارەکی بۆ فێركرنا زمانێ عەرەبی، مفاوەرگرتن ژ پرۆگرامێن پەیمانگەھێن فێركرنا زمانا، بكارئینانا تەكنۆلۆژیایێ د فێركرنا زمانی دا، پێشئێخستنا مامۆستایێن زمانێ عەرەبی و ڤەكرنا خولان بۆ فێربوونا شێوازێن نوی یێن فێركرنێ و هندەک راسپاردە و پێشنیازێن دی.

ل دویماھیێ باوەرنامێن پشكداریێ ل سەر پشكداران ھاتنە دابەشكرن و پشكا زمانێ عەرەبی ل كولیژا پەروەردا بنیات ب ناڤێ زانكۆیا دھۆك سوپاسیا پشكداران ژ زانكۆیێن دی كر. ھەژی ئاماژەپێدانێ یە پشكێن زانستی یێن كولیژێن زانكۆیا دھۆك بەردەوام چالاكیێن ھەڤپشك ل گەل زانكۆیێن دی ئەنجامددەن ب مەبەستا ئالوگۆركرنا پێزانین و سەربۆران و مفاوەرگرتن ژ ھەڤدوو د پرۆسێسا فێركرنێ دا.

راگەھاندنا زانكۆیا دھۆك؛ ١٤ـی گولان ٢٠٢٣

راپۆرت: جۆڤان سەعید

فۆتۆ: محەمەد عەبدولکەریم