شاندێ کولیژا زانستێن تەندروستی سەرەدانا خۆ بۆ زانکۆیا ساساری ب دویماهی ئینا
أغسطس 14, 2022, 10:27 ص

بۆ پتر بەردەوامیدانێ ب بەرنامێ (پشتەڤانی و پێشڤەبرنا پرۆگرامێن خواندنێ و لابۆرێن پزیشکی) کو ئەڤ بەرنامە ب پشتەڤانیا (ئایسپۆ) و ب هەڤکاری دگەل زانکۆیا ساساری یا ئیتالی ل زانکۆیا دهۆک دهێتە بجهئینان و ماوێ وی سێ سالن، شاندێ کولیژا زانستێن تەندروستی ب سەرۆکاتیا د. وەلید جەمیل عومەر، راگرێ کولیژا ناڤبری و هەر ئێک ژ د. ئازاد ئەحمەد سەرۆکێ پشکا زانستێ لابۆرێن پزیشکی و د. ئیسماعیل محەمەد رێکخەرێ پرۆژەی، سەرەدانا خۆ یا ١٥ رۆژی بۆ زانکۆیا ساساری ب دویماهی ئینا، کو د ڤێ سەرەدانێ دا، دگەل هژمارەکێ ژ نویترین پێشڤەچوونێن لابۆرێن پزیشکی ئاشنابوون و بۆ پتر پێشڤەبرنا ڤی بەرنامەی، هژمارەکا کۆمبوونان ئەنجامدا.

راگرێ کولیژا زانستێن تەندروستی ل دۆر ڤێ سەرەدانێ خویا کر "ستافێ زانکۆیا ساساری چەندین تەکنیکێن نوی د بوارێ لابۆر و ئامیرێن پێشکەڤتی یێن بزیشکی دا بۆ مە شرۆڤەکرن و هەروەسا ئەم دگەل سەرۆکێ زانکۆیا ناڤبری کۆمبووین بۆ پتر لێک تێگەهشتنێ ب تایبەت د چارچووڤێ بەرنامێ ناڤبری دا".