ب بەرهەڤبوونا سەرۆكێ زانكۆیا دهۆك (پ.د. مصلح محەمەدسەعید دهۆكی) و چەندین مامۆستا و قوتابیێن زانكۆیێ روونشتنەك بۆ هەر هەر دوو سیاسیێن ناڤدار، (ستاف وورد) راوێژكار و نڤیسەر و (ئامەد دەمیركان) نڤیسەر و ئەكادیمست، ل هولا دوو ل سەنتەرێ رەوشەنبیری و جڤاكیێ زانكۆیا دهۆك ئەنجامدا.
سەرۆكێ زانكۆیا دهۆك (پ.د. مصلح محەمەدسەعید دهۆكی) دپەیڤا خودا گۆت:" دان و ستاندن لسەر ئاریشەیێن هەرێما كوردستانێ و عیراقێ دڤێ قوناغێ دا گرنگیەك تایبەت هەیە و ب تایبەت دناڤ زانینگەهێ دا، د بنەرەتدا دستوور بنگەهێ هەرە بلندێ هەرەما یاسایێ یە د وەلاتی دا و هەمی یاسایێن وەلاتی ل ژێر رووناهیا وی دهێنە دارشتن، هەروەسا سیستەمێ حوكمرانی و برێڤەبرنێ تێدا دهێنە دیار كرن، كارێن هەرسێ دەستهەلاتێن وەلاتی و پەیوەندیا د ناڤبەرا وان دا و سنوورێن دەستهەلاتێن وان و پێگیری و مافێن سەرەكی یێن هاولاتیان و گەرەنتیێن وان بەرامبەر دەستهەلاتان دیار دكەت، ئەگەر ئەم سەحكەینە دستوورێ عیراقێ یێ سالا 2005 ئەوێ نوكە دهێتە بجهئینان ژ لایێ ناڤەرۆكێ و نڤیسینێ ڤە، رەنگە گەلەك مافێن گەلێ كورد تێدا هاتبنە دەستەبەركرن و تێدا ب جوانی هاتبنە دارشتن هەر ژ مادێ 140 (ل دۆر دەڤەرێن كێشە ل سەر) و چەندین مادێن دیتر یێن گرێدایی ئازادی و مافێ مرۆڤی و رادەربرینێ و هەلدانا بیرێن نوی یێن پەترۆلێ و مافێ وەلاتیبوونێ، بەلێ ژ لایێ ب جهئینانێ ڤە حكومەتا عیراقێ (ئانكو بەرفرەهتر بێژین) ئەو دەستهەلاتێن پشتی دەركەفتنا ڤی دستووری حوكم ل عیراقێ كری و هەتا نوكە چەند پێگیر بووینە ب ڤی دستووری ئەڤە جهێ پسیارێ یە ل نك هەر تاكەكێ كورد، كو هیڤیێن مەزن ب عیراقا نوی ڤە دبرن كو ئەم پشكەكا كاریگەربووین د دانانا ڤێ عیراقا نوی دا و ب ئارەزومەندانە پشتی شەرێ ئازادكرنا عیراقێ ل سالا 2003 جارەكا دی ئەم چووینە د گەل عیراقا نوی یا فیدرال و هەمی تێكوشینا سەركردایەتیا كوردی بۆ سەركەفتنا ئەزموونا عیراقا نوی بوو (عیراقەكا فیدرالی دیموكراتی) بەلێ ڤان هەولان سەرنەگرتن".
سەرۆكێ زانكۆیا دهۆك دیاركر:" چونكو ئاریشا مە ل گەل عەقلیەتا دەستهەلاتدارێن عیراقێ یە، چەند دستوور بهێنە نڤیسین و چەند مادە و یاسایێن سەردەمیانە بهێنە تەشریع كرن ب تنێ ئەو لوژیكا هێزێ دزانن، هەر ژ دامەزراندنا دەولەتا عیراقێ و هەتا نوكە ئاریشا مە كوردان ل گەل ڤێ عەقلیەتێ بوویە، ئەو عەقلیەتا چ ژ دستووری نەزانیت و باوەری ب مافێ یێ بەرامبەر نەبیت، باوەری ب مافێ مرۆڤی نەبیت باوەری ب پرەنسیپێن گشتی یێن برێڤەبرنێ نەبیت تەنانەت باوەری ب دانوستاندنان ژی نەبیت، دستوور چەند جوان بۆ بهێنە نڤیسین یا بێ مفایە و ئەنجام دێ ئەڤە بن یا نوكە ئەم دبینین، ل كاودانەكێ وەكو یێ نوكە و پشتی عیراقێ پەیوەندیێن خۆ ل گەل هەرێمێ گەهاندینە ڤی رادێ نوكە ئەم دبینین و هوسا رەفتارێ ل گەل هەرێمێ دكەت، بۆ حكومەتا هەرێمێ ژی سەرەدەری و پەیوەندی ل گەل ڤێ عەقلیەتا ل بەغدا دەستهەلاتدار دێ یا ب زەحمەت بیت، دانوستاندنان چ مفایێ خۆ نابیت ئەگەر بەغدا رێزێ ل بۆچوونا هەرێمێ نەگریت و وەكو وان دڤێت دستوور و یاسایان بخۆ تەفسیر بكەن، چونكی ئەگەر د بنەرەت دا حكومەتا عیراقێ پێگیری ب دستووری كربا و بەندێن ڤی دستووری ب دروستاهی بجهئینابان رەوشا نوكە عیراق تێدا نە دگەهشتە ڤی رادەی، ب تایبەت كو شارەزایێن دستووری ئاماژێ ددەنە وێ چەندێ كو حكومەتا عیراقێ نێزیكی 50 بەندێن دستووری ل گەل هەرێما كوردستانێ پێشێل كرینە، ب دیتنا مە ئەڤ پێشێل كرنە دەستپێكا سەرهلدانا قەیرانانە د ناڤبەرا حكومەتا هەرێمێ و حكومەتا مەركەزی، پشتی ئەڤ قەیرانە ژی پەیداكری نوكە یا ئامادەنینە بزڤریتە دانوستاندنان ل گەل هەرێمێ، كو ئەڤە ب خۆ ئاماژەكە ژبۆ وێ چەندێ حكومەتا بەغدا باوەری ب وی دستووری نینە ئەوا ئەو پرۆپاگەندێ بۆ بجهئینانا وی دكەت و دڤێت بهێتە بجه ئینان، ژبەر هندێ ئەم دبینین كو ئەگەر ل داهاتی دانوستاندن ژی د ناڤبەرا هەرێمێ و بەغدا دا چێببن دڤێت كەسێن دستوور زان و یاسازان شیرەتێن وان بهێنە وەرگرتن و مفا ژێ بهێتە دیتن بۆ دانوستاندنان، چونكو ئەگەر ل دیف دستووری كار برێڤە بچن كەلەك ژ ڤان كارێن نوكە عیراق بەرامبەر هەرێمێ دكەت دێ هێنە راوەستاندن و گەلەك كارێن هەرێم دكەت د دستووری نە و دێ د بەرژەوەندا هەرێما كوردستانێ دابیت".
لدووڤدا هەر دوو سیاسیێن ناڤدار، (ستاف وورد) راوێژكار و نڤیسەر و (ئامەد دەمیركان) نڤیسەر و ئەكادیمست، دەست ب سمینارێن خۆ كر لگۆر دستور و مافێن گەلان و دستورێ عیراقێ یێ سالا 2005ێ، پاراستنا مافێن مللەتێ كورد یێن تێدا هاتینە دیاركرن، دیسان گرنگیا دستوری بۆ هەر وەلاتەكی و چەوانیا سەرئێخستنا پروسیسا دیموكراسیەتێ برێكا دستوری.
راگەهاندنا زانكۆیا دهۆك: هەلز عەلی سەلیم