ڤەکۆلینەکا زانکۆیا دهۆک: شانۆیا دهۆکێ ب لڤین و مۆزیکێ و مفاوەرگرتن ژ فۆلکلۆری بزاڤا کارتێکرنێ ل وەرگری کریە
Dec. 5, 2022, 5:58 p.m.

راگەهاندنا زانکۆیا دهۆک؛ ٤ـی کانوونا ئێکێ ٢٠٢٢

د ڤەکۆلینەکا ماستەرێ دا، کو ل پشکا دراما یا کۆلیژا زانستێن مرۆڤایەتی ل زانکۆیا دهۆک هاتیە گەنگەشەکرن، پشتی ڤەکۆلەر (قەدری عوسمان شێرۆ)ی هژمارەکا شانۆگەریێن سالێن ٢٠٠٠ـێ تا ٢٠٢٠ـێ وەکو سامپل وەرگرتین و شرۆڤەکرین، گەهشتیە وی ئەنجامی کو بۆ بدەستڤەئینانا تەماشا وەرگری و کاریگەری لێکرن و گوهارتنا وی ژ رەوشەکێ بۆ رەوشەکا دی، ڤان شانۆگەریان گرنگی ب سیستەمێ لڤینێ دایە. هەروەسا بۆ بجهئینانا ڤێ ئارمانجێ، دەرهێنەرێن شانۆگەریێن هەلبژارتی ب شێوەکێ بەرچاڤ پشتبەستن ل سەر ئەزمۆنگەریێ‌ و بكارئینانا رتمێن لڤینێ یێن گونجای د گەل مۆزیكێ کریە. ژ لایەکێ دی ڤە، بۆ دروستکرنا پەیوەندیێ د ناڤبەرا لەشێ زارڤەكەری و لڤین و ئاماژە و هێمایان دا، ل دویڤ سیستەمێ ئاماژەیی یێ زارڤەكەری، مفا ژ فۆلكلۆرێ كوردی هاتیە وەرگرتن، چ بكارئینانا ئەفسانێن کوردی یانژی سترانێن فۆلکلۆری.

د ڤێ ڤەکۆلینێ دا هاتیە دیارکرن كو رەهوانیا زارڤەكەری د شانۆیێ دا، هژمارەكا شێوازێن زارڤەكرنێ‌ ب رەنگەكێ‌ هۆنەری پەیدادكەت. ئەڤ شێوازە دبنە ئەگەرێن سەرەکی بۆ بدەستڤەئینانا تەماشا شانۆیی. ئانکو شانۆیا كوردی یا ڤالا نەبوویە ژ پێكهاتێن جوانیێ بۆ راکێشانا سەرنجا تەماشەڤانێ‌ و کاریگەری لێکرن و گوهارتنا رەوشا وی، ئەڤجا چ شانۆیا كوردی یا هەڤچەرخ بیت، یان ژی دیاردێن دەستپێكی یێن سەرهلدانا شانۆیا كوردی.

ئەڤ ڤەكۆلینە، راوستیانەكە ل سەر جوانکاریێن شێوازێ‌ زارڤەكرنێ د شانۆیا هەڤچەرخ دا ل دەڤەرا بادینان و گرنگیا بدەستڤەئینانا تەماشێ‌ ب رێكا نمایشكرنێن شانۆیا كوردی بۆ پەیداكرنا هەڤبەندیەكێ‌ د ناڤبەرا ئەکتەری و وەرگری دا، کو ئاشۆپا وەرگری هانبدەت بەرەڤ راڤەكرن و دروستکرنا پەیوەندیان ڤە بچیت.