ل رۆژا 3/2/2019 سەرۆكێ زانكۆیا دهۆك پ. د. مصلح دهۆكی پێشوازی ل د. عوسمان شبلی هاریكارێ راگرێ كۆلیژا پزیشكیا ددانا ل زانكۆیا بافالو یا ئەمریكی و بەرپرسێ پەیوەندیێن نێڤدەولەتی یێن وێ زانكۆیێ كر، مەرەم ژ سەردانا وی پشتەڤانی كرن بوو ژ بۆ ڤەكرنا یەكەیەكا نوژداریا ددانا ل كەمپێ خانكێ یێ ئاواران.
د دیدارەكی دا سەرۆكێ زانكۆیا دهۆك خۆشحالیا خۆ بۆ ڤی كارێ هەڤپشك دەربری كو ب رێكا زانكۆیا دهۆك ئەڤ خزمەتە بگەهیتە ئاواران و دیار ژی كر كو زانكۆیا دهۆك هەردەم هیڤیخازە پەیوەندیێن خۆ پێشبێخیت دگەل زانكۆ و ناڤەندێن ئەكادیمی یێن جیهانی و ئەنجامێ ڤان پەیوەندیان مفا بگەهیتە جڤاكی ب گشتی.
ژلایێ خۆڤە د. عوسمان شبلی دیاركر كو د بەرنامێ وان دایە پەیوەندیێن خۆ دگەل زانكۆیا دهۆك د سێ بیاڤان دا پتر پێش بێخن ئەو ژی ڤەكۆلینێن هەڤپشك و دیسا لێك گوهورینا زانستی و رەوشەنبیری و سەرەدانێن هەردوولا داكو ئەڤ هەرسێ خالە ببنە شەنگەستە بۆ كارێ هەڤپشك.
ل هەمان رۆژ یەكەیەكا نوژداریا ددانا ل كەمپێ خانكێ یێ ئاواران كو ب هەماهەنگی ناڤبەرا زانكۆیا دهۆك و زانكۆیا بافالو یا ئەمریكی هاتەڤەكرن، رێڤەبەرێ كەمپێ خانكێ یێ ئاواران پیر عەلو دیار كر كو نزیكی 30 هزار ئاواران ل سنۆرێ خانكێ دێ مفایی ژ خزمەتێن ڤێ یەكەیا پزیشكیا ددانا وەرگرن.
د. بهار جەعفەر راگرا كۆلیژا پزیشكیا ددانا ل زانكۆیا دهۆك دیاركر كو زانكۆیا دهۆك ژ بلی ڤەكرنا ڤێ یەكەیێ بەری نوكە ژی كلینیكێن گەرووك ل ناڤ كەمپێن ئاوان دا ڤەكرینە داكو خزمەتا ئاواران بهێتە كرن.
كەمپێ خانكێ یێ ئاواران ل تەباخا 2014 هاتیە چێكرن پتر ژ 3120 خیڤەت بۆ ئاكنجیبوونا ئاوان تێدا هەنە و 16 هزار ئاوارە د ڤێ كەمپێ دا دژین زێدەباری ئاوارێن دەرڤەی كەمپێ ل سنۆرێ خانكێ كو دبنە نزیكی 30 هزار ئاواران.