زانكۆیا دهۆك چلیا د. حەجی موسا گێرا
مايو 27, 2018, 9:25 م

زانكۆیا دهۆك رێورەسمەكێ‌ ماتەمینی ب هەلكەفتا چلیا وەغەركرنا مامۆستا د. حەجی موسا ل رۆژا 24/5/2018 ل هۆلا خانی ل سەرۆكاتیا زانكۆیا دهۆك گێرا.
د رێورەسمان دا كو مالبات و دوست و هەڤالێن خودێ‌ ژێ‌ رازی و مامۆستا و فەرمانبەرێن زانكۆیێ‌ بەرهەڤ ببون، سەرۆكێ‌ زانكۆیا دهۆك پرۆفیسۆر د. مصلح دهۆكی د پەیڤەكی دا پەسنا كەساتیا د. حەجی موسا كر و گۆت خودێ‌ ژێ‌ رازی هەمی شیانێن خۆ تەرخان كربوون بۆ كاروبارێن زانكۆیێ‌، هەر ژ وانەگۆتنێ‌ و سەرۆكێ‌ پشكێ‌ و پشتی بوویە هاریكارێ‌ سەرۆكێ‌ زانكۆیێ‌ ژی كێماسی د كارێ‌ خۆدا نەكریە و رۆلەكێ‌ گرنگ گێرایە و هەردەم بزاڤێن وی ئەوبوون خزمەتێ‌ ژ بۆ زانكۆیا دهۆك بكەت، ئەو رۆژا نەخۆش بووی و گەهاندیە نەخوشخانێ‌ و هاتیە نڤاندن هەتا نیڤرۆ ژی ل ڤێ‌ زانكۆیێ‌ دەوام یا كری، دیار ژی كر كو گێرانا چلیا خودێ‌ ژێ‌ رازی مەبەست ژێ‌ ئەوە ئەو كارێ‌ وی بۆ زانكۆیێ‌ كری زانكۆ چ جاران ژبیر ناكەت.
فلمەكێ‌ دكیومێنتاری ل دۆر ژیانا د. حەجی موسا ژ لایێ‌ رێڤەبەریا راگەهاندنا زانكۆیێ‌ ڤە هاتبوو بەرهەڤ كرن د وان رێورەسمان هاتە نیشادان، پەیڤا بنەمالێ‌ ژی ژلایێ‌ كورێ‌ خودێ‌ ژێ‌ رازی ڤە (ئەشوان) ی هاتە خاندن و سوپاسیا زانكۆیا دهۆك كر بۆ گێرانا ڤان رێورەسمان و سوز دا كو بەردەوام ل دویف وێ‌ رێكێ‌ بچن یا بابێ‌ وان بۆ دانایی.
د. حەجی موسا حەسەن ل سالا 1964 ژ دایك بوویە و ل سالا خاندنێ‌ 1989 ـ 1990 باوەرناما بەكالوریۆسێ‌ و ل سالا 2001 باوەرناما ماستەرێ‌ ب بیركاریێ‌ ل زانكۆیا میسل وەرگرتینە، ل سالا 2002 قەستا زانكۆیا دهۆك كریە و ل كۆلیژا زانست وەكو مامۆستا هاتیە دامەزراندن، ل سالا 2005 هاتیە دەستنیشان كرن وەكو سەرۆكێ‌ پشكا ماتماتیك ل كۆلیژا پەروەردا بنیات و ل سالا 2010 باوەرناما دكتورایێ‌ ل زانكۆیا دهۆك وەرگرتیە، ل سالا 2015 بوویە هاریكارێ‌ سەرۆكێ‌ زانكۆیا دهۆك بۆ كاروبارێن كارگێری و دارایی، ل رۆژا 14/4/2018 وەغەرا دووماهیێ‌ كریە.