سەرۆکێ زانکۆیا دهۆک سەرا کولیژا پزیشکی دا و دگەل جڤاتا وێ کۆمبوو
Sept. 26, 2022, 7:21 p.m.

ئەڤرۆ رۆژا دووشەمبی رێکەڤتی ٢٦ـێ ئەیلوولا ٢٠٢٢ـێ، د. داود سلێمان ئەتروشی سەرۆکێ زانکۆیا دهۆک سەرەدانا کولیژا پزیشکی کر، و ب بەرهەڤیا هەردوو هاریکارێن سەرۆکێ زانکۆیێ د. ئەحمەد محەمەد سالح و د. لوقمان هادی حەسەن دگەل جڤاتا کولیژا پزیشکی کۆمبوو.

د دەستپێکا سەرەدانا خۆ دا، بۆ پتر ئاگەهدار بوون لسەر برێڤەچوونا ئەرکێن کارگێی و زانستیێن کولیژا پزیشکی، سەرۆکێ زانکۆیێ و شاندێ دگەل دا، دگەل راگڕ و مامۆستایێن کولیژێ سەرەدانا هندەک پشک زانستی و یەکەیێن کارگێریێن کولیژا پزیشکی کر، چەندین گۆتوبێژێن گرنگ دگەل فەرمانبەر و برپرسێن کارگێری ئەنجامدان.

پشتی سەرەدانێ، سەرۆکێ زانکۆیا دهۆک دگەل جڤاتا کولیژا پزیشکی کۆمبوو، ئێک ژ گرنگترین تەوەرێن کۆمبوونێ باسکرن بوو لدۆر بابەتێ پرۆسەیا پشتبەستنێ بوو ب کولیژا پزیشکی، دەربارەری ڤێ چەندێ ژی، د. دلدار حاجی مووسا راگرێ کولیژا پزیشکی راگەهاند: کولیژا پزیشکی دەرفەتەکا زێرین هەیە بۆ بدەستڤەئینانا پرۆسەیا پشتبەستنێ ژ لایێ لژنەیا کولیژا پزیشکی یا ئیراقێ ڤە، کو ل هەیڤا بهێت دێ سەرەدانا کولیژا پزیشکی ل زانکۆیا دهۆک کەن، کولیژا پزیشکی ژی هەمی ئامادەکاری کرینە بۆ ئەڤێ پرۆسەیێ، بدەستڤەئینانا ئەڤێ باوەریێ ژ لایێ لژنا کولیژا پزیشکی یا ئیراقێ، دەستکەڤتەکا مەزنە بۆ کولیژا پزیشکی ل زانکۆیا دهۆک، ژبەرکو پشتی بدەستڤەئینانا ئەڤێ باوەریێ، فیدراسیۆنا جیهانی یا پەروەردا پزیشکی (WFME) دێ سەرەدانا کولیژا پزیشکی کەت و دێ باوەریپێدانێ ب کولیژا پزیشکی بەخشیت.

ژلایێ خۆ ڤە سەرۆکێ زانکۆیا دهۆک د. داود سلێمان ئەتروشی، خۆشحالیا خۆ ب ڤێ پێنگاڤا گرنگا کولیژا پزیشکی دیارکر و پشتەڤانیا خۆ بۆ ڤێ پێنگاڤا گرنگا کولیژا پزیشکی دیارکر و بدەستەڤەئینانا ڤێ باوەریێ ب دەستکەڤتەکێ مەزن ل قەلەم دا.

د بەردەوامیا کۆمبوونێ دا، گۆتوبێژێن ڤەکری لدۆر چەندین تەوەرێن گرنگ یێن کولیژا پزیشکی ب مەرەرما زێدەتر پێشڤەبرنا ئاست و کوالێتیا زانستی و دابینکرنا پێداویستیێن کولیژێ.

دیسان بهێزترکرنا پەیوەندیان د ناڤبەرا کولیژا پزیشکی و کەرتی ساخلەمیێ دا ل پارێزگەها دهۆکێ ئێک ژ تەوەرێن گرنگێن کۆمبوونێ بوو، لدۆر ڤێ یەکێ سەرۆکێ زانکۆیا دهۆک راگەهاند "کولیژا پزیشکی جهێ شانازیێ یە بۆ زانکۆیا دهۆک، ژبەر وی رۆڵێ گرنگێ د کەرتێ ساخلەمیێ دا هەی ل پارێزگەها دهۆکێ".